(Lalaki nangita sa bukog sa iyang ig-agaw)
Buloy: Unsaon man nato pag-ila sa bukog sa imong ig-agaw Toy nga gidam-ok ra man ning mga bukog diri.
Bitoy: Dali ra siguro Loy kay sa China man to natawo akong ig-agaw.
Buloy: Ngano man diay og sa China natawo?
Bitoy: Aw! Duna gyud toy tatak iyang bukog nga made in China (Toink!/Aguy!)
Hehehehehehehehehehehehehehe!
Unsa ba ka sagrado ang bukog sa tawo?
Genesis 1:27 “ Og gibuhat sa Diyos ang tawo sumala sa iyang panagway”.
Lahi sa bukog sa mananap ang bukog sa tawo maoy kabilin sa templo sa gasa sa kinabuhi nga gipahuwaman sa kahitas-an. Kini buhat sa Diyos dayag lang nga ang salin sa iyang mugna sagrado.
Matud ni Padre Nestor Atillo sa Mother of Perpetual Help sa Barangay Jaclopan sa Siyudad sa Talisay sama nga ang mga bukog sa mga santos nga nahibilin gitipigan ug gibalaan.
Subo lang palandongon nga dili ingon kahapsay ug kamaayo ang pagpahiluna sa ubang mga bukog sa mga kinabuhing mitaliwan. Tungod ba kaha kay dili tanang mga sam-ang dunay maayong kapahimutangan sa bukog o tungod sad kaha sa kapakyas sa mga tagtungod pagpahiluna sa kabilin sa ilang mga mahal sa kinabuhi.
Mao gani siguro nga dunay mga mipili pagsunog sa ilang mga patay gawas sa panugon sa mga hingtungdan kay mas masiguro man ang paghipos sa abo. Mahiuban pa sulod sa panimalay ang kabilin sa mitaliwang kinabuhi.
Diha bitaw bata.
Siana: Tay kabawo naku nganong spirit ray muadto sa langit mabilin ang bukog?
Bitoy: Ha! Ngano man anak?
Siana: Ang spirit kugihan ang bukog tapolan(Toink!/Aguy!)
Hehehehehehehehehehehehehehehe!
Og nganong dunay mga bukog nga nagpasad lang sa dakong krus usa sa labing dakong hinungdan ang kwarta. Dunay mga tagtungod nga dili makaabot sa presyo sa pahimutangan, sakit man sa buot apan ihangad na lang sa kahitas-an ug ipaagi na lang sa pag-ampo ang hingpit nga paghiluna.
Gani karon nga duna nay pag-uyon ang simbahan sa cremation sa kamahal sa proseso unsaon na lang ang mga tagtungod nga kabus sa motaliwan nga buot magpasunog.
Dili kaha matinuod ang komedyang:
Buloy: Tinuod Toy nga magpa-cremate imong Tatay?
Bitoy: O lagi Loy maoy panugon ni Tatay sa dayong kamatay.
Buloy: Unya pwerte mang mahala anang cremation.
Bitoy: Mao gyud. Mao gani nga aron dili kayo mahal ako lang hangyoon ang punerarya nga i-half-cook lang(Toink!/Ayay!)
Hehehehehehehehehehehehehehehe!
Pastilan! Apan naglabi sa kamatuoran tinuod nganong dunay mga bukog nga wala mamaayo pagkahimutang mao ang kahagip-ot.
Unsaon nga hasta ang kamatayon karon kahadlokan na dili lang tungod kay dili pa ka andam moatubang sa Diyos kun dili mahal na kaayo ang mamatay(Toink!/Aguy!)
Hehehehehehehehehehehehe!
(emailad:jomar_bellita@yahoo.com)