Ang ika-upat nga impeachment complaint batok ni Arroyo gikan ni sa grupo sa mga estudyante nga gipangulohan sa anak ni Mayor Jujimar Binay, usa sa mga lokal nga opisyal nga kaalyado sa oposisyon.
Di na hinuon ta matingala kon lakip ang mga anak sa mga kontra's politika sa presidente ilang iapil sa ilang katonto. Apan ang dakong surprisa alang nako mao ang pag-apil sa Catholic Bishops Conference of the Philippines sa panon sa mga traditional nga mga politiko pagpasaka og impeachment complaint batok ni Arroyo.
Si Bishop Deogracias Iñiguez, usa sa mga opisyal sa CBCP, maoy miduso sa ikatulong impeachment complaint. Sama sa mga pasangil sa unang duha ka mga mipasaka og impeachment, gisubli ni Iñiguez ang pasangil sa pagpanikas, pagtugot sa summary killings sa mga militant leaders ug uban pang pasangil sa pangurakot.
Ang gihimo ni Iñiguez klarong wa masubay sa gimbut-an sa prinsipyo sa "separation of the Church and the State." Bisan og gihanigan niya nga ang iyang gihimo way labot sa iyang posisyon sa CBCP kon dili isip usa ka concern citizen sa nasud, apan di niya mahimong biyaan ang kamatuoran nga opisyal siya sa simbahan.
Isip opisyal sa simbahan, dunay dakong obligasyon si Iñiguez paghatag og sumbanan ngadto sa mga sakop sa simbahan. Ang kainit sa sitwasyong politikal sa nasud, gisugnoran pa hinoon niya, inay nga magsilbing tubig pagpabugnaw sa init nga sitwasyon.
Ang pag-apil sa CBCP sa isyu sa impeachment, naghatag og signal sa katawhan labi pa sa mga sakop sa simbahan nga di tahoron ang gobyerno ni Arroyo. Sa laktud, posibli ni nga himoong rason sa katawhan nga di na mosunod sa mga polisiya ug balaud nga ipatuman sa kagamhanang Arroyo sanglit ang kadagkuan sa simbahan wa man motoo nga lihitimo ang iyang pagpamuno sa nasud.
Naklaro nga dili lang personal nga lakang ang gihimo ni Iñiguez kon dili iya gyud sa CBCP tungod kay lakip ang tigpamaba sa Artsidyosisis sa Sugbo nisuporta niini. Si Msgr. Achilles Dakay atol sa interview sa DYLA miingon nga ilang gisuportahan ang lakang ni Iñiguez tungod kay mao kiniy paagi aron masayran ang tinuod sa pasangil pagpanikas sa miaging eleksiyon.
Kon kamatuoran maoy gusto sa simbahan, wa na kinahanglana nga sila moapil sa kalihukang politikal aron mogawas ang kamatuoran. Mamahimo man nilang ipressure ang Kongreso o ba kaha bantayan ang unang mga impeachment complaint nga giduso na nga wa kinahanglana nga mopasaka sab sila og kaugalingong reklamo.
Ang rason ni Msgr. Dakay mao nga dunay moral dimension ang maong isyu sanglit naglambigit kini og pasangil sa pagpanikas sa miaging eleksiyon. Mura man og nakalimot si Msgr. Dakay nga apil man ang simbahan sa pagbantay sa balota sa miaging eleksiyon.
Kon mituo si Dakay sa pasangil nga nanikas ang presidente, diin man diay mo niadtong eleksiyon nga kabahin man mo sa nagbantay nga limpiyo ang piniliay? Duna pa man gani'y kaugalingong kopya ang simbahan pinaagi sa mga accredited arms niini sama sa C-CIMPEL ug NAMFREL nga mihimo pa og quick count.
Kon dunay tikas, wa diay mo kakita niini sa dihang inyong gihimo ang quick count ug ang pagbantay ninyo sa matag presento? Sa ato pa way kapuslanan ang inyong pag-apil apil sa eleksiyon kay mismong kamo di man motoo sa resulta sa kalihukan nga inyong gibantayan. Kon mao man gani nga di mo motoo, mas maayo pa og dili nalang mo moapil sa sunod nga eleksiyon.