Lupon giputlan?

Bisan og wala na ko magpublikar sa numero sa akong mobile phone, apan duna gihapo'y uban nga makakontak g'yod nako - ang uban motawag g'yod sa opisina - aron sa paghatag og inpormasyon.

Usa sa akong nadawat nga inpormasyon mao ang gihimong pagronda sa kapolisan sa panimalay sa usa ka Randy Boliboli, lumulopyo sa dalan Espelita, sakop sa barangay Pasil.

Ang panimalay ni Boliboli gironda sa mga polis kaniadtong lapas na ang tungang gabii sa Sabado, sa ato pa Domingo na.

Ang mitawag kanako kagahapon nagduda nga adunay binuang sa maong raid kay si Boliboli ug ang iyang mga sakop, nakagawas man kuno dayon.

Wala usab ko makadungog og report nga ang kapolisan mironda sa panimalay ni Boliboli, apan nakadungog ko og report nga kini si Boliboli gikatahapan nga usa sa nagpadagan og masyaw dinhi sa Sugbo.

Sagdi lang, karong adlawa akong susihon didto sa fiskaliya kon duna bay napasakaan og kaso kabahin sa pag-operate og masyaw.

Kabahin sa kahibulong nga ang madakpan nga makalapas sa Republic Act 8297 (pag-usbaw sa silot sa illegal numbers game) gamay ra man god og pyansa mao nga mabuhian ra dayon. Sigi, mohatag ko kaninyo og update sa maong police operations.

* * *

Ang laing report nga akong nadawat mao ang operasyon sa mga tawo nga giingong nagpatoo nga mga pari.

Mangayo kuno kining mga tawhana og donasyon gikan sa mga lumulopyo. Ang tigpaniid nako sa barangay Punta Princesa miingon nga nakabantay siya sa modus sa maong mga tawo didto sa ilang dapit.

* * *

Nangalipay intawon ang mga kawani sa lainlaing kabarangayan nga nasayod nga makadawat sila og tag-usa ka sakong bugas-humay karong pasko isip pinaskuhan sa City Hall kanila.

Giaprobahan na sa konseho sa dakbayan ang sugyot ni konsehal Eugenio "Jingjing" Faelnar nga nagpagahin og lima ka milyon ka pesos nga salapi aron ipalit og P5,000 ka sakong bugas humay.

Sigurado nga magpasalamat ang mga kawani sa barangay ani, apil na ang mga tanod ug sakop sa Lupong Tagapamayapa.

Apan unsa ni nga report nga akong nadawat? Gisuspenso kuno sa City Hall ang additional incentive nga gihatag ngadto sa mga sakop sa Lupong Tagapamayapa sa kabarangayan dinhi sa dakbayan sa Sugbo.

Sa laktud nga pagkasulti, walay makaboot sa dakbayan kon mopadayon ba sila sa paghatag og honorarium ngadto sa mga sakop sa Lupon.

Apan luoy baya ang mga sakop sa Lupon kay allowance ra tawon ang ilang gidawat, unya kapoy ang ilang trabaho.

* * *

Milutaw na ang ngalan sa laing mga bilyako nga kawani sa City Hall nga maoy giingong nangisyu og piki nga business permit.

Ang mga sakop sa revenue task force sa city hall miendosar na sa National Bureau of Investigation sa mga dukomento aron ang usa ka tax examiner ug pipila ka kawani sa dakbayan mapasakaan og kaso.

Kinahanglan g'yod nga palagputon sa serbisyo kining maong mga tawo unya pasakaan og kaso nga kriminal. Walay mga uwaw kining tawhana. Midaghan lang ang ilang kwarta sa sigi og pangurakot, pangbulsa sa kwarta nga para unta sa buhis sa kagamhanan.