10 ka TRA sa probinsiya butangan og solar power
CEBU, Philippines — Ang napulo (10) ka mga Tourist Rest Area (TRA) nga gahinan og pundo sa Kapitolyo ang butangan sab og solar power energy aron paghatag og kuryente sa pasilidad.
Ang unang TRA nga mabutangan niini mao ang sa lungsod sa Pinamungajan nga gikatakdang magbukas karong Disyembre 3.
Si June Ilyn Terados sa Provincial Planning and Development Office, nagkanayon nga ang siyam pa ka TRAs nga pondohan sa Probinsya ang butangan sa maong renewable energy kon kini nga mga pasilidad magsugod na ang operasyon.
Ang TRA sa Pinamungajan nahimutang sa 1, 322.2 metro kwadrado nga luna sa Barangay Pandacan. Kini adunay nagkadaiyang amenities sama sa pasalubong centers, charging stations, lounge, mini-food court, coffee shops, ug limpyo nga restrooms, ug uban pa aron hamugaway alang sa mga lokal ug langyaw nga tourista nga buot mopahuway samtang sila nagsuroy suroy sa mga tourism destinations sa lalawigan.
“We’re so lucky and blessed kay dako kaayo ning impact dili lang sa Pinamungajan but sa tanan nga mobisita sa south kay nindot kaayo ang facility” matod ni Pinamungajan Mayor Jessica Baricuatro, sa taho sa Capitol Information Office.
Matod ni Baricuatro nagplano pud sila nga ibalhin ang bus terminal sa lungsod gikan sa barangay Poblacion padulong sa Pandacan aron duol sa TRA.
Gawas sa Pinamungajan, ang ubang TRA nahimutang pud sa Bogo city, Madridejos, Santander, Dumanjug, Balamban, Pilar, Poro, Tudela, ug San Francisco sa Camotes Island, kon diin matag usa ka pasilidad adunay dili momenus tag P8 million nga pundo. — (BANAT NEWS)
- Latest
