Kasosyo ni Kerwin
Ang ginganlan ni Kerwin Espinosa nga nakatabang sa pagtubo sa iyang negosyo sa shabu sa Sugbo nahilambigit og kaso nga moambas sa kamabulukon sa iyang raket.
Si Lovely Impal Adam nga gitumbok ni Espinosa nga maoy kinakusgan niyang tinubdan sa shabu gawas ni anhing Jeffrey Diaz alyas Jaguar nabalhug sa Cebu City Jail human nadakpi tungod sa pasangil sa pagpamaligya og shabu niadtong 2006.
Si Adam, 39, nihulagway sa iyang kaugalingon nga negosyante og sinena gikan sa Celiron, Iligan City busa sige nga biyahe sa kanasuran sa Asya. Nangangkon usab si Adam nga supplier sa Salad Dressing sa SM City, D. Blaz, Beauty Land ug Lovelys Closet ug tagdumala og beauty parlor sa Talamban. Duha ang bersiyon sa iyang pagkasikop.
* * *
Unahon natong bersiyon sa PDEA: Sa Alas-9:30 sa gabii sa Hulyo 7, 2006, human sa makuting plano, giduol si Adam ni FO1 Rayford Yap kuyog sa ilang informant sa pizza shop sa Fuente Osmeña ug gipalitan og shabu.
Gipasunod ni Adam sila si Yap sa parking area. Gikuha ang pakete sa shabu sa compartment sa iyang Toyota Fortuner nga may plakang YCX 965 ug gitunol ngadto ni Yap.
Nipaila si Yap sa iyang kaugalingon, niduol ang ubang sakop sa PDEA, ug gidakop nila si Adam, gibasahan sa iyang mga katungod, gidala sa PDEA diin natimbang nga 50.27 ka gramo ang shabu nga ilang nakuha.
* * *
Nia ang bersiyon ni Adam: Sa alas-10 sa gabii sa Hulyo 7, 2006, nagsawo sila’g pizza sa upat niya ka anak ug ilang mga yaya kuyog sa iyang higalang si Ana. Taudtaod, niabot ang higala ni Ana nga si Rose nga nihatag og bag. Dihang mamauli na unta, gibabagan ang ilang sakyanan. Niingon si Adam nga gitionan sila og mga armas sa mga lalaki nga nagpailang taga PDEA.
Gidakop sila tungod sa drug trafficking. Pag-abot nila sa PDEA, nakaila niya si Ryan Rubi kinsa niingon nga gipasaligan nga buhian kun makatudlo og laing drug trafficker. Maong gitudlo niya si Rose, nga napugos sab pagtudlo ni Ana. Matud ni Adam naglibog na ang PDEA nga sa ilang blotter si Rubi nay nalista nga tag-iya sa iyang Fortuner.
* * *
Gibasura ni kanhi Justice Secretary Raul Gonzalez ang kaso kay wa kapakita ang PDEA sa buy-bust money. Pagka Enero 26, 2007, unom ka buwan human sa insidente, gipabuhian ni kanhi RTC Judge Gabriel Ingles si Adam.
Apan 22 ka adlaw sa wa pa ang desisyon ni Ingles, nga karon maoy Executive Justice sa Court of Appeals sa Kabisay-an, gipasaka ang petisyon sa writ of habeas corpus alang ni Adam atubangan sa Korte Suprema. Nahusay ang petisyon sa Hunyo 8, 2007, dul-an lima ka buwan human nakagawas si Adam, busa uwahi na ang tanan.
* * *
- Latest
