Saputon sa uyab

Dear Tito Miguel,

Maayong adlaw , ako diay si  Paula Mae , taga Barili, Cebu. Tulo ka tuig na ang relasyon namo ni  Niño John . Wala ko kasabot sa akong kaugalingon , dunay mga higayon nga saputon ko  kung makakita sa dagway ni Niño John . Ambot lang, kun nganong ingon ani ko usahay. Dili man sad ko mabdos  ug wala sad mi nag-ipon og puyo. Panagsa rapud mi magkita kay puros mi busy sa among tagsa-tagsa nga trabaho. Ganahan ko ugkaton ang rason kun nganong saputon ko niya usahay ,pero dili gyud nako matugkad. Ngano kaha ni Tito Miguel ? Naglabad gyud akong huna-huna sa pagpangita og rason kun nganong saputon ko niya. Basin taphaw ra tingale akong gugma niya nu? Boutan ra baya si Niño John,  usahay rako makakita niya masuko.  —Paula Mae-

* * *

Paula Mae,

Ayaw na pangitaa ang rason, lagmit dili nimo makit-an. Sama ra na nga nahigugma ka’g ngil-ad og batasan, daghan og bisyo ug mangingilad. Dili ka kasabot ngano, mopilit gihapon ka’g magpakabuta bungol. Tingali tungod ka’y ang gugma gidiktaran sa dughan, dili sa utok. Busa dili kini moila o maminaw sa rason. Hinuon, ang siyensiya niingon nga ang tanan gibati pagbuot sa utok. Apan tingali ang utok mismo mao’y moilad kanato o dili mosulti sa tinuod.

Lagmit sakto ka, taphaw ra imong gibati niya. Buotan man kaha, apan ngano sa iyang dagway sapoton ka. Dili na ko mangutana’g guapo ba o bati’g nawong. Ka’y lagi kun nahigugma ka, bahala’g ang nawong dili makaon, imong dawaton. Di gihapon ka kasabot ngano. Gani, kasagaran mauyab o maminyoan sa mga tawo ang kadtong dili nila type nga porma o hitsura. Di sab ta kaingon nga napul-an ka, ka’y panagsa ra mo magkita. Lagmit imong pagbati nihupas na. Wala sab kini rason ngano, nihupas ra’g kalit nga wala nimo damha ug tuyoa, busa ayaw basola imong kaugalingon.

Kun gusto gyud ka makahibawo asa siya dapit sa imong kinabuhi, sultihi sa tinuod. Ingna inyo suwayan nga magbuwag, aron masuta ninyo unsa inyong tinuod nga gibati sa usa’g usa. Wa ka kahibawo, dugay na sab siya nga wa na’y gana nimo. Kun mingawon ka’g daw haw-ang kun wala siya, nahigugma ka. Kun daw mahuwasan ka’g nakalingkawas ug malipayon, ayaw na’g balik sa inyong kagahapon.   —Tito Miguel

Magpatambag ka? Ipada kang Tito Miguel: 0991-318-9366