Makalimot sa anniversary

Dear Tito Miguel,

Maayong adlaw, ako diay si Eurica , taga Talisay City.  Naproblema ko sa batasan sa akong uyab nga si Ken nga taga Mandaue City.  Permi siya makalimot sa  anniversary sa among relasyon.  Ako ra makahuna-huna og surprise niya basta anniversary. Ako rapud ang mag-initiate sa pag-celebrate niini ,like mag-dinner mi or manglaag sa nindot nga mga lugar. Wala ra gyud siya'y  pakialam. Ang permi niya irason, dili na daw importante ang pagtimaan sa anniversary, ang importante daw mao ang tinud-anay nga gugma namo sa usag-usa. Sapoton ko sa iyang rason. Unsaon mani nako siya uy?  - Eurica -

* * *

Eurica,

Pasagdi, kun magtimaan siya sa inyo anniversary tungod ka’y masuko ka kun malimot siya, dili siya sinsero kun magselebrar mo. Gani, basin napugos pa siya. Nakakaplag ka’g lalaki nga dili sweet.

Sakto iyang giingon nga mas importante ang tinud-anay nga gugma kay sa anniversary. Kana kun tinuod nga tiunay siya kanimo. Ka’y kun dili niya ipakita ang pagpangga kanimo kanimo matag  adlaw, kun uga gihapon siya, basin wala gyud siya’y gugma sa sugod pa lang.

Apan basin iya lang gyud nang personalidad ang dili motimaan ug moselebrar sa anniversary. Ingon ana kasagaran nga  lalaki. Duna man gani lud-on mag valentine’s day. Para nila OA o porma ra na o gara gara. Lain lain man ang paagi pagpadayag sa gugma, duna’y showy o expressive, posible ikaw na, duna puy hilom ra o mora la’g wala, posible siya na.

Imo man kaha nabati nga pinangga ka ug gimahal, ayaw na pangayo’g dugang. Kun ikaw ra magdumdum o mag-initiate sa inyong anniversary, mao sab na imong paagi pagpadayag sa imong gugma niya.

Dili man kaha siya magkisi-kisi kun mag- date na mo. Buot pasabot ganahan sab siya, makalimot lang. Duna daw parte sa utok sa mga babaye nga maayo motimaan sa mga anniversary, apan wala kini sa mga lalaki. Kun duna man, dili aktibo. Busa dawata na lang. Kun mao ra na iya kulang, imo na lang pun-an.

Tito Miguel

Magpatambag ka? Ipada kang Tito Miguel:  0991-318-9366