Dear Tito Miguel ,
Maayong adlaw, ako diay si Charlie, taga Barangay Mabolo, Cebu City. Upat ka tuig na diay ang relasyon namo ni Melissa . Nagkadugay ang among relasyon ba, nagka-OA man si Melissa uy. Bisan gatrabaho ko, sige gihapon panawag . Sige monitor sa akong gipangbuhat bisan kahibalo siya nga nag-work ko . Kasamtangan diay ko nga nag-work sa regional office sa usa ka government agency. Wala man koy problema sa pag-monitor niya kay normal ra man na,apan naobserbahan nako nga nagka-OA ra gyud. Gani kanang mga personal nako nga lakaw, sama na lang sa pagtambong nako og mga espesyal nga okasyon, mananghid man gud ko ana niya ,kay siyempre uyab gud. Apan bisan kahibalo na siya kun asa ko, sige gihapon og tawag, bisan wala'y importanteng tuyo. Nakaingon ko, kasamok ug ka-OA sad aning uyaba uy. Unsa ang angayan nakong buhaton ? — Charlie
* * *
Charlie,
Ayaw ihikaw nga kanimo siya manawag. Iya na nga katungod isip uyab. Apan kinahanglan dunay utlanan. Pasabta nga kun naa na ka sa trabahoan, dili na siya manawag gawas kun dunay emergency. Ang professional ug personal nga kinabuhi dili maayo usahon. Kinahanglan buwagon kay gawas nga ngil-ad tan-awon, makaapekto pa gyud sa kalidad sa imong mga buluhaton. Angay siya maikog sa imong mga kauban sa trabaho, labaw, pareha, o ubos og ranggo kanimo.
Ingna nga mas maayo sab dunay pipila ka oras sa usa ka adlaw nga dili mo konektado, aron duna moy hinangpon inigkita ninyo. Kay kun sige siya manawag mata’g karon ug unya, unsa pa may inyong ikabalita ini’g bagat ninyo. Wala na. Kun duna man, balik balik na. Kun dili makasabot ug dili mopatuo, ayaw tubaga iyang tawag. Kun imong tubagon, tabla ra nga imo siyang gikunsinti. Bahala’g awayon ka, pasagdi siya. Ang tinuod, sige na’g panawag aron bantayan ka, gusto siya makasiguro kun asa ka.
Sa laktod, wala siya’y salig kanimo. Kun mao, pangutan-a ngano magpadayon pa man mo? Ingna nga kun wala siya’y salig, undangon na lang ninyo ang inyong relasyon. Wala kini kapadulngan kun ang usa sige’g duda. Imbis mo-abante mo, moatras na hinuon. Imbis inyong gugma tagamtamon, sige na hinuon ka’g pamatuod kun asa ka dapit. Dili na relasyon, mahulog nga puro na lang interogasyon. Tito Miguel
Magpatambag ka? Ipada kang Tito Miguel: 0991-318-9366