Matintal sa lain

Dear Tito Miguel,

Maayong adlaw, ako diay si  JJ, taga Barangay Guadalupe, Cebu City. Maibog gihapon ko og laing babaye bisan minyo nako. Usahay, dili nako ma-kontrol, modiskarte gyud ko sa laing babaye, apan kutob ra gyud sa char-char, kay minyo na baya ko. Kapila na nako gipugngan ang akong kaugalingon, apan matintal man gyud ko usahay uy. Wala pa ko nasakpan bisan kausa kay busy man sa trabaho ang akong asawa.  Matag babaye nga akong mataypan, ingnon gyud nako daan nga minyo nako,ug kutob ra gyud mi sa char-char.  Unsa ang angay nakong buhaton aron dili nako matintal? Klarohon lang nako daan, love kaayo nako ang akong wife, apan matintal lang gyud ko sa lain. - JJ-

* * *

JJ,

Mahilig ka lang gyud, kun sa pagkaon pa, dako ka’g kaon, dugay o dili matagbaw. Insakto imong gibuhat nga sultihan daan nimo ang babaye nga minyo ka, aron siya magduha duha. Unta, apan ang angay di na lang gyud ka mopaduol.

Kun mopaduol man ka’g patolan ka, buot pasabot dili siya  tarong nga pagkababaye o pagkatawo mismo. Minyo gud ka, apan mo-entertain gihapon siya. Ayaw isugal ang imong kaminyoon sa babaye nga dili ligdong. Apan lagmit wala ka’y pakialam, ganahan lang gyud ka mag char char, bahala’g burikat pa na. Pag-amgo nga gawas sa bigaon ka, insecure ka. Imong gigamit ang atensyon sa mga babaye isip pagmatuod nga ikaw madanihon. Kun sila mopaduol nimo’g magpakita nga interesado, mora ka’g gibayaw. Kun wala’y babaye nga mopansin nimo, magtuo ka nga bati ka’g nawong nga wala’y mopunit kanimo.

Ka’y duna na man ka’y paninguha nga maglikay, pun-i pa. Kun duna ka’y maibgan nga babaye, palayo na lang, ayaw na’g duol. Ka’y samot nga mabitin kun sugdan nimo apan diha ra taman. Likayi ang sitwasyon nga duna’y temptasyon. Labi na ang inom, ini’g kahubog na, sa pamabaye’g pakighilawas ikaw kursunada na.

Angay sab ka mahadlok sa mga sakit nga makuha sa pakighilawas. Delikado, pila ka minutos nga kalipay, tibuok kinabuhi ka magmahay. Hinuon, ang tanan nga mangita’g lain usa ra’y katarungan, dili bitaw mahibaw-an. Sa karon, apan matud pa, wala’y aso nga makumkom.  -- Tito Miguel

Magpatambag ka? Ipada kang Tito Miguel: 0991-318-9366