Dear Tito Miguel ,
Ako diay si Jericho, unsaon mani nako akong amigo nga si Jan-Jan , bisan duna nay asawa, ma-attract gihapon og laing girl. Kun maglaag mi ni Jan-Jan, kusog kaayo magpa-cute sa laing babaye. Ako man siya nga badlongon, apan magpabungol-bungol raman siya uy. Dili pud ko ganahan nga motug-an sa iyang asawa kay basin ako na hinuon ang hinungdan nga magkagubot sila. Akong plano karon , modistansya na lang kaha ko sa akong amigo, aron dili ko makonsensiya. Maluoy bitaw ko sa iyang asawa. Dili ko ganahan motolerate sa iyang pagkasalbahis. Sakto ra ba ang akong plano? Or naa kay laing ikatambag? — Jericho
* * *
Jericho,
Sakto nga modistansiya ka, apan pasabta siya. Ingna nga dili man siya maminaw nimo, mopalayo na lang ka, basin mabasolan pa ka sa asawa nga wala gyud ka mosumbong sa binuhatan sa iyang bana. Ingna dili makaya sa imong kunsensiya maniid niya magbinuang samtang iyang asawa nisalig niya. Kay gibuhat na man nimo tanan pagpasabot ug pagtambag niya, pasagdi na. Natural sa cheater ang mamakak, manlingla ug magbudhi sa iyang asawa. Wala siya’y nakitang dautan, busa walay angay usbon. Gani, ang imong pagpalayo dili gihapon makapausab niya, basin pa gani mosamot ka’y wala na’y namadlong.
Pasagdi siya magduwa sa kalayo hangtod nga siya mapaso ug masunog. Sa kadaghan sa iyang babaye, moabot ra gihapon ang takna nga masakpan siya, labi na sa panahon nga siya nikumpyansa.Kay maski na masumbong ka sa asawa, dili gihapon siya mobiya sa iyang bisyo. Igo ra na motago apan sa pamabaye padayon gihapon. Kay lagi natural niya, dili siya mag-usab o makunsensiya. Gani, mas ganahan pa na kun badlongon o masakpan. Kay iyang pamatud-an nga kaya niya mamabaye samtang kasado ug pamilyado. Siya ang matang sa tawo nga lami-an sa bawal. Ang makapakgang niya dili pa ikaw o ang asawa, kun dili ang panahon pinaagi sa iyang edad ug kahimsog. Paninglan ra gihapon siya sa iyang lawas hangtod nga dili na siya maluwas. —Tito Miguel
Magpatambag ka? Ipada kang Tito Miguel: 0991-318-9366