Dear Tito Miguel ,
Maayong adlaw , ako diay si Charisse , taga Barangay Labangon ,Cebu City. Upat ka tuig na ang relasyon namo ni Niño nga taga Barangay Guadalupe,Cebu City. Usahay mopasumbingay siya nga ganahan na siya nga magpakasal mi. Igo rako mopahiyom kun maghisgot siya sa maong butang. Usahay magduha -duha ko sa pagpakasal kay duna ko'y higala nga minyo nga nagmahay nga nakasal siya sa iyang uyab. Nagoul siya kay maglisod na siya og buhi sa maong sitwasyon tungod kay nagpakasal na sila ug giagwanta nalang niini ang kangil-ad sa batasan sa iyang bana. Alang kanimo Tito Miguel ,unsa gyud ang mga butang nga angayan ikonsiderar kun mosulod og kaminyoon? Ngayo lang ko tips nimo aron dili ko masugamak sa maong butang. —Charisse
* * *
Charisse,
Kun dili supak sa imong tinuohan, magtigom mo daan. Diha nimo mailhan ang tinuod nga batasan. Kun nahadlok ka magkalisod mo, ikaw mismo makatubag na karon, duna ba moy trabaho o panginabuhian nga establisado?
Apan ang tanan sugal. Dunay nagsugod nga adunahan, apan nahisugamak sa kalisdanan. Duna sab nagsugod sa wala apan nilambo kadugayan. Kay segurista man ka, ayaw pakasal kun wala pa'y klaro nga panginabuhian kamong duha.
Kun bawal sa imong relihiyon o konsensiya ang mag-ipon, paniid sa iyang tinuod nga pagkatawo. Unsa iyang buhaton kun sukdon iyang pasensiya? Pananglit kun naglinya siya’g taas o gutom na kaayo, magbaton ba gihapon siya’g insakto nga pamatasan o mamalikas na’g mangaway?
Mahilig ba siya sa mga hayop? Kun dili, iya ba silang pasakitan? Giunsa niya’g tratar iyang mga higala ug pamilya, labi na iya’ng ginikanan? Ang tubag niini makatabang mohatag nimo’g timailhan. Apan balik gihapon ta, wala’y garantiya ang tanan. Pero yuna ra, kun hadlok ka mahisugamak sa imong uyab, posible ang tinuod nga rason dili pa nimo siya hingpit nga gihigugma. Kasagaran sa nahigugma mabuta, mamahala basta masiguro nga kamo makasado. Piyong kuno, makita ba nimo imong kaugalingon matiguwang sa iyang kiliran? Diha nimo makita ang tubag kun andam ka modawat tanan sa ngalan sa gugma.
Dili dautan ang imong pagduha- duha. Busa kun duna kay makita nga pula nga bandila, mahimo ka molangay sa kaminyoon aron dili ka mahinayak. O moatras aron dili mahisugamak. -Tito Miguel -
Magpatambag ka? Ipada kang Tito Miguel: 0991-318-9366