Gibaharan nga dili ipadayon ang kasal

Dear Tito Miguel,

Maayong adlaw ,ako diay  si Jan-Jan  taga Mabolo ,Cebu City. Engaged na diay mi sa akong girlfriend nga si Melanie . Naproblema ko kay sa time nga mag-away mi sa akong uyab , permi gyud siya mobahad nga maypa dili nalang namo ipadayon ang among kasal.  Karong August 27 ang petsa sa among kasal ,ug kanunay gyud niya ipamuka nako nga ako gyud ang atat nga magpakasal. Bout huna-hunaon ,sinabotan baya namo nga magpakasal. Wala gyud siya nagduha-duha sa pagtubag og "yes" sa dihang ni-proposed ko niya . Unsaon mani nako ?  Dili nalang kaha  ipadayon ang among kasal? Kay nahulog naman nga ako ra ang excited niini. — Jan-Jan

* * *

Jan-Jan,

Basin ang pagbahad mao na iya paagi pagpadayag sa iyang kalagot nimo. Apan dili  seryoso. O basin gisuwayan lang ka asa ka taman. Aron ka makahibaw’g tinud-anay ba,  inig sunod bahad ingna sugot ka. Tan-awa unsa iyang reaksyon. Lagmit makuratan. Mangutana’g seryoso ba ka. Tubaga sa tinuod nimo nga gibati. Na-insulto na ka sa iyang mga bahad, mora’g ikaw ra’y gusto kaslon mo.  Kun moingon aw naa ra man diay, di na ta molahutay. Buot pasabot dugay na siya nagplano, gipaagi lang niya’g ulbo ini’g away ninyo. Kun kalit mohilom, buot pasabot siya nakugang nga pareho diay mo’g plano. Kun daw para niya wala’y nahitabo, mopalayo’g dili na mopakita nimo, gibuhat na niya iyang pulong. Ayaw apasa. Dugay na siya nibiya nimo. Wala siya magduha-duha’g tando pakasal nimo, apan karon sayon ra niya nga kini kanselahon. Basin impulsive, mokalit ra’g desisyon maski wala’y sentido kumon. Lisod ni, ka’y ang importante iya ra nga kaugalingon. Bahala ka unsa imong bation.

Pero’g mangamuyo nga ang kasal inyo ipadayon, mopasalig nga ang pagbahad di na niya usbon, klaroha unsa gyud iyang plano. Labaw sa tanan, pangutan-a inyong mga kaugalingon, tiunay ba ang gugma ninyo sa usa’g usa? Ka’y kun sayon ra niya ang pagbiya, ikaw sad karon nagduha duha, buot pasabot inyo’ng gugma dili pa lig-on. Gamay nga bikil, buwag dayon. Kun wala na mo’y gugma, undang na. Kun duha duha pa, ayaw lang ikansela, isibog sa laing petsa aron masukod ninyo ang gugma sa usa’g usa. Tito Miguel

Magpatambag ka? Ipada kang Tito Miguel: 0991-318-9366