Panahon na alang sa pagdiskarte

Dear Tito Miguel,

Ako diay si Keystone, taga Mabolo, Cebu City.  Naa koy crush, siya si Kathlyn. Nakabantay ko ba nga kusog raman pud siya mo-entertain sa akong mga pa-cute nga chat. Mangayo ra ko advice nimo Tito Miguel, unsa kaha ang possible nga signal nga mahimo nako nga modiskarte niya? Ganahan kay ko niya. —Keystone

Keystone,

Ang iyang pag-entertain sa imo maoy senyales mismo nga nikagat siya sa imong pagpaporma niya. Kay kun dili pa siya ganahan nimo, dugay na siya nidistansiya. Pila ray pag block di ba. Ang babaye dali ra na makamatikod kun hinigala lang ba o dunay laing plano ang lalaki kaniya.

Nagpa-cute man kaha ka, buot pasabot undanon imong mga chat niya. Nakuha na niya. Lagmit giganahan sab siya nimo. Kay kun dili pa dugay na siya giluod. Apan pagmatngon, ayaw kaayo pagdahom. Kay dunay mga babaye nga maayo mo psy-war. Abi nimo giganahan nimo, gipasakay lang diay ka. Duna sad abi nimo naglagot nimo, nagpatagad ra diay. Duna pu'y  agresibo, ipakita gyud unsa ilang gusto. Mao pa’y mouna’g diskarte.

Kay siya mo-engage man sa imong chat, positibo kini nga timailhan. Wala siya manirado. Busa ayaw na’g langay, ipadayag na imong tuyo niya. Wa ka kahibawo, dugay na siya nagpaabot nimo. Basin maunhan pa ka sa lain. Kun pananglit wala diay siya’y gusto kanimo, at least gisuwayan nimo. Kay sa wala nimo gisuwayan apan ganahan diay nimo. Gani, sa primero posible wala siya’y gusto, apan kun ipakita nimo unsa ka ka sinsero ug determinado, dunay purohan ma-fall siya nimo. —Tito Miguel

Magpatambag ka? Ipada kang Tito Miguel: 0991-318-9366