Wala mohatag og sustento

Dear Tito Miguel,

Ako diay si Yen, taga Toledo City. Dugay nami nga buwag ni Archie, ug naa nami usa ka anak nga ako ray nagbuhi. Dili gyud mohatag og sustento si Archie ay. Magduha-duha ko og adto sa korte , kay basin dako ko og magasto ba. Unsa akong buhaton Tito Miguel? —YEN

Yen,

Dili man kinahanglan dako’g gasto kun modangop ka sa korte. Mahimo ka mosuway’g duaw sa Public Attorney’s Office aron makisusi kun unsay angayan nga legal nga lakang aron mapugos imong kanhi uyab pagsustento. Libre ilang serbisyo sa mga kwalipikado, kun mapakita nimo nga wala kay katakus pagbayad sa pribado nga abogado.Depende sad kun unsay matang sa kaso ang isang-at sa korte. Kun igo ra ka magpasustento sa inyong anak, civil na. Dunay bayranan nga filing fee. Kun pila, depende sa kantidad nga imong gipangayo alang sa sustento o danyos ba kaha. Kun nagpuyo mo sa usa ka barangay, kinahanglan pa ni nimo i-agi didto. Apan duna ba sad siya’y katakus mosustento? Basin wala siya’y panginabuhian, tan-awon sad ni sa huwes.

Kun apilan nimo’g reklamo ang iyang pag-abuso pinaagi sa paghikaw sa pinansiyal nga suporta sa inyong anak, usa na ka matang sa violence against women and their children. Mao ni ang kriminal nga kaso, dili kinahanglan ang filing fee.

Kay legal man imong suliran, kinahanglan gyud ka mokunsolta’g abugado aron sigurado. Mahimo sad ka modangop sa Integrated Bar of the Philippines. Duna sila’y gitawag nga legal aid, libre kini nga serbisyo sa mga abugado nga niboluntaryo.  Mahimo sad ka modangop ug makisusi sa police. Duna sila’y women’s and children’s desk nga makagiya ug makaabag kanimo. Duna sad mga non-government organization nga motabang sa mga babaye’g inahan ug mga bata nga giabuso’g gihikawan sa ilang bana, karelasyon o amahan.  — Tito Miguel

Magpatambag ka? Ipada kang Tito Miguel: 0991-318-9366