Bisan pa’g patyon ko ninyo

“Dalia, Dalia, unsa god ning utang ni Erico nga puwerte na man ning taasa. Gasige ka’g  pautang ni Erico unya wala na lay bayadbayad, mao ba?” mura’g nasuko na si Agustin sa iyang nakita sa listahan.

Si Erico anak ni Rosana nga hinigugma kaniadto ni Agustin. Ug dili gyud tingali nila suwerte kay wala man sila magkadayon. Si Milia maoy iyang naasawa nga ig-agaw ni Rosana.

“Luoy man sad kon dili pautangon Pa. Masakiton ang iyang inahan ug si Erico way trabaho. Kon dili nato pautangon og bugas ug mga delata nga sardinas unsa may ilang kan-on mangapasmo sila,” pahayag ni Dalia. Pero ang tinuod duna sila’y relasyon ni Erico. Duha na ka tuig nga sila manag-uyab. Ila lang kini nga gitago apan nahibaw-an gihapon nila ni Agustin ug Milia.

“Aaa ingna nuon Dalia, nga imong gipasige’g utang si Erico kay uyab mo. Unsa man gusto ka nga paundangon tika sa imong pag-eskuyla? Kon dili nimo buwagan kanang imong uyab nga anak sa pinaangkan, ayaw na la’g eskuyla undang na lang. Anugon ang gasto!” lanog ang tingog ni Agustin.

“Buwag god Pa, dili nako buwagan si Erico, uy. Bisa’g patyon pa ko ninyo!” Maoy tubag ni Dalia. “Unsa! Ayaw ko’g tubaga ingon ana ha!” Mibukal ang dugo sa amahan ug iyang nadapatan si Dalia kay bugtong nilang anak.

“Hoy, Agustin! Ayaw na husto na mabun-og na ang atong anak,” ni Milia nga migakos sa bana.

Pagkaugma sa buntag wala na si Dalia sa iyang kuwarto. Miipon na kini kang Erico didto sa ilang balay. Tungod niini igo na lang sa pagpanghupaw ug pagpanghayhay sila si Agustin ug Milia.

Si Agustin kahilakon nga nagtan-aw sa listahan sa utang kay si Erico man ang pinakadako ug tua pa gyud sa  iyang bukton ang pinangga nilang anak puwerte gyud nilang alkansiha. Pero sige na lang kay makakita na man unya sila’g apo gibuga na pod ni Agustin ang usa ka halawom nga panghupaw. (Kataposan)