Hisugatan ni Homer si Alado nga suod niyang higala ug maoy iyang kaduwaduwa kaniadto ug mitaho nga si Elyong tua na sad sa ilang Estrellita ug nakita pa kini niya nga nakig-istorya na sa dalaga diha sa ilang pantawan. Apan igo lang mipahiyom si Homer nga ingon sa nakatamihid sa pagkatawo ni Elyong kinsa maoy iyang karibal sa gugma ni Estrellita.
“He, he, kon si Elyong lang ang makigribal nako, Bay Lado, puwede gani nga hatagan ko siya’g partida, mamisita ko kang Estrellita karong gabii ug magsul-ob lang ko’g porontong,” ni Homer nga mitingsi. Mipahiyom si Alado, “Aw, kon porma lang ug kaguwapo layo ra kaayo na si Elyong nimo, Bay Homer. Guwapo god ka, ug daghang naibog dinhing mga dalaga nimo... pero kana si Elyong dili lang gyud kompiyansahan kay maayong motabi, ug magdaladala ra ba’g Bibliya ug unya iyang basabasahan si Estrellita. Mipahiyom lang pod si Homer ug namulong, “He, he, tan-awon nato kon makadama ba si Elyong kang Estrellita, kay ugma mao na man ang adlaw nga ako nang sunahon si Estrellita bahin sa gipadayag niya nga gugma, ug kon iya na ba kong sugton...”
“Aw, way problema, Bay Homer, ikaw lagi ang sugton ni Estrellita ug dili si Elyong.
Guwapo ka, propesyonal kay usa ka civil engineer ug dunay dakong ranggo sa kompaniya nga imong gitrabahoan, samtang si Elyong bugason kaayo’g nawong...”
Tuod, pagka ugma sa gabii sa pag-adto ni Homer sa ilang Estrellita maoy hiabtan niya sila si Nang Goria ug Noy Estong nga subo kaayo ang mga hitsura. “Homer, si Estrellita usa na ka semana nga wala mopauli, ug may sulat siyang gibilin nga ipahatag ug ipabasa nimo,” ug gidunol ni Noy Estong ang sulat. Gibasa dayon kini ni Homer.
Ang sulat nagkanayon, “Homer, sorry kaayo si Elyong maoy akong gipili ug dili ikaw siya maoy akong gihigugma — Estrellita...” Humag basa, ingon sa mikurog si Homer ug may luhang miagas gikan sa iyang mga mata. Panadtaran, San Fernando, Cebu (Kataposan)