Hinumdumi ang atong awit

Gisakitan si Celso sa pagbudhi kaniya ni Evelyn. Nagpakasal kini sa usa ka tiguwang dato nga si Mr. Hipolito. Guwapa kaayo si Everly. Husto sa barog, puti og pamanit, bus-ok ang lawas ug migraduwar nga magna cum laude sa kursong gikuha. May hinigugma siya nga si Celso—kabos nga mag-uuma nga silingan niya, apan may talento, ug ambongan usab.  Igo lang nakatapos sa hayiskul. Mao kini karon nga dunay nagdugo nga kasingkasing.

Ug matag gabii kanunay’ng madungog sa mga silingan ang awit sa pagmahay sa  ulitawo. Ug madunggan pod gani nila nga ini’g human kanta niini, modanguyngoy kini’g hilak.

“Celso, anak, ayaw na la’g hunahuna si Everly. Minyo na siya. Dili gyud tingali suwerte nga kamo ang magkadayon,” ni Inse Patricia nga inahan ni Celso.

“Iya kong gibudhian, Nay. Sakit, sakit kaayo, Nay. Gipili gyud niya nga adto siya makigminyo og bilyonaryo ug dili kanako nga usa lang ka pobreng mag-uuma, hu, hu, hu...” ug mihilak si Celso.

Unya, misantop sa hunahuna ni Celso nga mobiya sa ilang dapit aron adto sa laing lugar manimpalad. Tuod, pagpanglabay sa daghang katuigan nadungog si Celso nga  naka asawa’g bilyonarya nga biyuda, ug karon dato na usab kaayo. Ug dihang mibalik si Celso sa ilang balangay sa Sugbuwan, wala damhang nagkasugat ang ilang dalan ni Everly.

“Celso, sayod kong hangtod karon nagdumot ka pa nako,” hinay ang tingog ni Everly. Nia sila karon sa usa ka mamingaw’ng dapit sa ilang balangay — ang abotonan nilang baybayon.

“Ako nagdumot, no, no, wala ko magdumot nimo, Everly, kay kining akong kasingkasing dili kamaong modumot. Apan ang kangulngol sa samad niini mabatyagan ko gihapon hangtod karon, oo, nahimo nang  uwat ang samad sa gibilin mong pagbudhi, apan ang gisakitan ko lang, Everly, kay gibinlan mo ako’g awit, nga hangtod karon nagpabilin pang buhi ning akong kasingkasing,” ug midungoy si Celso ug unya iyang gilabog ang iyang panan-aw didto sa nagginukdanay’ng mga balod nga dunay mensahe sa awit ning wala damha nilang panagkita. (Katapusan)