Dugay na karon may duha ka batang babaye ug lalaki nga nagduwaduwa sa lunhaw’ng balili. Suod kaayo ang duruha ug ingon sa way kamatayon ang ilang kalipay sa matag higayon nga magkaabot sila dinhi sa may patag nga bahin sa banika. Sila mao si Roberto ug Lolita.
Ug sa paghingkod nilang duha duna nay kal-ang ang ilang panagsuod, apan may mga higayon nga manuroy sila sa may bungtod nga may lawom nga bung-aw. Ug dili tuyoon nga makita nila ang pag-arko sa bangaw ug si Lolita modayog ingon. “Unta akong makab-ot kanang bangaw. Kaanindot sa ilang mga kolor, dunay red, blue, yellow, gree ug orange.”
“Ang bangaw kahulogan sa pangandoy, Lolita, ug kon buot mong kab-oton ang iyang mga bulok, mahimo kaayo, kana kon buligan ka sa kapalaran,” hinay ang tingog ni Roberto.
Tuod, bisa’g wala nila ikapadayag ang ilang mga pagbati, apan masabot nga duna nay mga kadena nga mibalikos sa tagsatagsa nila ka kasingkasing. Ug nahitabo gyud nga nagkalagyo silang duha.
Si Lolita gikuha sa iyang amahan nga tua na sa Amerika manimuyo.
Si Roberto ania lang gihapon dinhi sa ilang balangay sa Puting Rosas nga usa lang intawon ka mag-uuma ug kutob lang sa second year high school. Milabay ang daghang katuigan.
May usa ka adunahang magpapatigayon nga nagtukod og usa ka dakong hotel.
Nagtukod usab og beach resort ang maong magpapatigayon nga usa ka dalagang guwang.
Usa ka adlaw nahasuroy si Roberto sa baybayon ug didto wala damhang iyang gikahibalag si Lolita. “Lolita, imo na gyong nakab-ot ang bangaw,” ni Roberto sa hinay nga tingog. “Ug gibuligan ka sa kapalaran kay nahimo kang usa ka adunahang magpapatigayon, samtang ako ... samtang ako...”
“Roberto, oo, husto ka, kay sama natong duha, nagkita ta nga mga edaran na, apan ang atong kasingkasing nagdugtong gihapon...” Ug gigakos ni Lolita si Roberto nga dunay mga luha ang mga mata.
Panadtaran, San Fernando, Cebu
(Kataposan)