Pagpukaw sa tim-os nga gugma

Nanimba sila si Noy Bong ug Nang Esay sa “pontifical mass” atol sa kapistahan ni Sr. San Guillermo. Pagkahuman sa misa nangadto sila sa seawall ug didto sila mohanggap og preskong hangin ubos sa naglaggiting kainit sa adlaw.

“Mom” matud ni Noy Bong nga miagbay sa abaga ni Nang Esay, “mora man og kahapon pa kita kasla diha sa maong simbahan. Kusoga sa dagan sa panahon. Trayenta na ka tuig ang milabay, nakatapos na tanan ang atong mga anak sa  ilang tagsa-tagsa ka mga kurso, daw di katuhoan!”

“Bitaw no,” naka panglingo si Nanay Esay, “sunod tuig, magminyo na sab ang atong kinamagulangan nga anak, si Dayday.”

“Aw wa tay mahimo, sulondon man na wa man pod tay angay nga kabalak-an kay doktor man ang iyang pamanhonon.”

“Lain pay ato Mom, kon dili pa ako ang imong napili nga imong ikauban sa imong kinabuhi unsa kahay mga estado nato karon?”

“Ngano man diay Pop?”

“Daghan man god ang nangulitawo nimo nga mga gwapo, ako may na swertehan.”

“Unya ikaw may akong nagustohan magbuot diay sila?” Nangatawa sila samtang naggunitay sa ilang mga kamot nga medyo dili na kaayo hamis tungod sa kadaghan na sa mga katuigan nga nanglabay.

“Gipili ko ikaw Pop tungod kay nakita ug nasulayan ko ang imong kabuotan, gawas pa wa kay giapilan nga bisyo ug akong nakita ang katim-os sa imong gugma kanako.”

“Salamat Mom,”  miagbay na usab si Noy Bong kang Nang Esay.Unya mikiring ang cell phone.

“Kinsa man nang ning text Mom?”

“Uy hala, paadtoon na kuno kita sa ka mareng Sally kay igong wa pa moabot ang ilang ubang mga bisita makigdungan sa paniudto.” Nanindog sila og samtang nanglakaw sila paingon sa ilang kumpare ug kumare Lito-Sally nag-iyahay sila’g pukaw sa halandumon ug matam-is nilang kagahapon. Kataposan