Kamatayon mo, kamatayon ko

Gilikayan si Omeng ni Bernadet kay lagi laksot man kaayo ang iyang nawong. Siya maoy tighakot og tubig sa ilang Mr. Roga maong naibog gyud siya sa anak niining si Bernadet.

Dinhi sa balangay sa Santa Ines sila si Bernadet ang matawag nga tubigtubigan tungod sa ilang kayutaan nga misangkad gikan sa bungtod paingon sa baybayon nga naglawod sa mga lubi ug uban pang mga tanom. Karon, samtang nagsinangay og tubig nga iyang dad-on sa ilang Mr. Roga, diha si Bernadet namubo sa mga bulak sa ilang tanaman.

“Bernadet, maligo ka, kay pun-on nako ang duha ka baril diha sa inyong banyo?” ni Omeng nga miduol sa dalaga. “Pagka guwapa gyud nimo, Bernadet, wala nay binuhat ning kalibotan nga akong nakita nga hilabihan ka guwapa, ikaw ra gyud Bernadet. Ug kon mahimo lang, ayaw intawon ko’g likaylikayi, kay bisa’g bati ko’g nawong, ikaw man ang akong gugma, ikaw ang tanan alang kanako. Ug andam kong mahimo mong ulipon sa tanan panahon,” ni Omeng nga nagbitbit sa iyang sinangay’ng guod.

“Wa ka uroy mauwaw no, Omeng, nga sa kabati nimo’g nawong may kaisog kang moduol nako,” ni Bernadet nga mibutang sa kabo ug mihana sa paglakaw aron biyaan si Omeng.

“Bernadet, Bernadet, asa ka, ayaw ko’g biyai, magsultianay una ta,” misulbong ang tingog ni Omeng. Apan misaka na sa taas sa ilang balay si Bernadet.

Unya, usa ka gabii dihay misaka sa balay nilang Bernadet nga mga tulisan, ug gitulis sila. Buot lugoson ang dalaga apan misukol kini ug mibuto ang armas sa tulisan tumong sa dughan sa dalaga. Maayo gani kay diha si Omeng ug iyang gisuklan ang mga tulisan, iyang giilog ang ilang mga armas.

Ug iyang gipusil. Naigo si Omeng, naunhan siya ug natumba apan buhi, pa, mibawos siya sa pagpusil. Napatay niya ang mga tulisan. Ug sa hagawhaw nga tingog nagkamang siyang miduol sa wala nay kinabuhi nga dalaga. “Bernadet, Bernadett, ubanan ko ikaw kay mahal tika, o Bernadet...”  Panadtaran, San Fernando, Cebu

 (Kataposan)