Karaang panginabuhi nga gibiyaan

Ngilngig nga mangunguot si Magno sa siyudad ug mao kini ang gibuhi niya sa iyang pamilya. Ang paborito niyang istambayanan mao ang dalan Colon diin dunay daghang nagpunsisok nga mga tawo.

Batan-on pa niadto si Magno ngilngig na siyang manguot. Iyang nakat-onan kining matanga sa panginabuhi gikan sa iyang amahan nga si Pascual nga maoy orihinal nga ngilngig kaayong manguot. Ug karon siya na ang labing ngilngig nga mangunguot dinhi sa siyudad. Ug dihang naminyo na siya kang Elena ang matahom nga dalaga sa ilang lugar ingon sa mikalma. Dili  gusto ang iyang asawa sa mao niyang panginabuhi, apan mohilom lang gihapon siya’g panguot. Ug dihang nakaanak sila ug dihang midako na si Gabriel, nasakit si Elena og kanser sa matris.

“Magno, dili na tingali ko magdugay ning akong kahimtang. Mopahuway na tingali ako sa dayon, kay migrabe na man ning akong sakit ug magsige’g suol ug ngulngol ang akong pus-on,” ni Elena nga luya kaayo. “Ug gusto nako nga mohunong ka na sa imong pagpanguot, pangita og laing trabaho kanang dili limbong o supak sa kabubut-on sa Dios. Ug si Gabriel padak-a sa pinasingotan nimong panginabuhi. Dakong sala ang maong buhat, Magno. Ug dili ko gusto nga mahibawo ang atong anak nga ikaw nga iyang amahan usa ka banggiitang mangunguot sa Colon.”

Tuod, mipanaw gyud si Elena sa wala nay pagbalik, ug mihilak si Magno nga nanumpa diha sa haya sa iyang asawa nga magbag-o na siya ug dili na gyod manguot pa. Paglabay sa pipila ka mga bulan, maoy makita sa mga silingan si Magno nga maoy mitulod sa karo sa Mahal nga Birhen nga maoy patron nila dinhi sa ilang sityo, ug si Gabriel maoy usa sa mga leader sa mga relihiyosong batan-on nga nagpasibaw sa ilang mga bugle, tambol ug turotot. Pangilin karon sa ilang patron nga ang Mahal nga Birhen sa Kanunany’ng Panabang. Ug nausab ra gyud ang dagan sa kinabuhi ni Magno. Wala na siya sa karaan niyang panginabuhi. Ug si Gabriel nakalampos ra gyud sa iyang pagtuon. (Kataposan)