Bilanggoa ako sa imong mga gakos

“Unsa, bay si ... si Shirly naibog nako?” ingon sa natulon ni Cardo ang iyang laway sa gitaho ni Kolas niya. Kay dili man god maayo nga balita kay kon mahibawo ang amahan ni Shirly bahin niini lagmit ipakulata gyud siya niini sama sa nahitabo ni Goding. Labihan tawong bun-oga ni Goding kay maayo kaayong pagkamumo sa iyang baba nga naigo sa mga kinumo sa mga batabata sa amahan ni Shirly.

“Ayaw kahadlok ana, bay, uy. Ang iyang anak maoy nakagusto nimo. Busa, wala siya’y mahimo. Sige lang, kon magkita ming Shirly ako siyang ingnon nga nahadlok ka sa iyang papa...” miigham si Kolas. “Bay, bay Cardo, si Shirly, naa siya. Naa, ay, nanaog sa iyang kotse. Ug nia paingon dinhi sa atong nahimutangan...” ni Kolas nga nag-ukay-ukay sa gilunod nang hinog saging kardaba nga ilang baligya.

“Hoy, Cardo, duna na kay linutong saging mantikaan, no. Palita ko bi, kay ganahan gyud ko’g saging, uy....” ni Shirly nga miduol.

“Duna na, Shirl, nia ay 10 ni ka buok...” ni Cardo nga mora’g naratol pero ingon og sa nadasig kay guwapa ug seksi man pud gud ni si Shirly. Tuod, gipakyaw ni Shirly ang 10 ka buok. Unya pagka gabii samtang naglakaw si Cardo subay sa dalan Colon may usa ka kotse nga mihunong sa iyang tungod, kotse ni Shirly. Gipasakay si Cardo sa kotse ni Shirly ug wala makabalibad si Cardo.

Ug wala siya kahibawo kon asa sila paingon. Apan pagka buntag sayo, maoy nadunggan ni Cardo ang tingog ni Shirly nga paraygon kaayo kinsa tupad na niya paghigda sulod sa usa ka pribadong lawak sa usa ka motel. Niini pa, Cards, ayaw ko’g biyai, ha, bilanggoa ko kanunay sa hugot mong mga gakos...”

Wala kasabot si Cardo sa iyang gibati karon. Kay didto sa iyang hunahuna miesena man ang bayhon sa amahan ni Shirly kuyog sa mga bodyguards niini aron bukbokon ug kulatahon siya, kay pobre intawon siya nga gikaibgan niining anak sa usa ka dato sa siyudad. (Katapusan)