Gipahiluna sa pagbutang ni Fe ang dala niyang mga pungpong sa lab-as nga bulak, atubangan sa nitsong lubnganan sa iyang bana ug gidagkotan usab niya ang dala niyang espesyal nga dakong kandila. Ning buntaga, adlaw sa kasaulogan sa Kalagkalag, nagdasok na ang mga tawo sa sulod sa sam-ang sa Carreta. Mikibot dayon ang baba ni Fe nga nagtindog sa nitso sa mitaliwan na niyang bana.
“Boy, ning laing kasaulogan karon sa Kalagkalag, mituyo ko nga sayo sa akong panagkot, kay may ipananghid ko nimo! Hinaot unta nga masabtan mo ako. Gitug-anan na usab nako sila si Denis ug Lea, ang duha ta ka mga propesyonal nga anak nga pulos na mga CPA ug misabot sila nako...!”
Nakapanglingo si Fe. Nakasaad man gud siya sa namatay niyang bana sa pagtunod na niini sa iyang lubngan nga dili na gayud mahigugma pa pag-usab ngadto sa usa ka lalake. Apan wa siya magdahom nga human molabay ang lima ka tuig sa iyang pagkabiyuda sa edad nga 50 na karon, mibati siya’g gugma sa kauban niyang maestro nga usa ka gulang ulitawong maestro sa edad nga 40.
“Nakakat-on ko sa paghigugma og usab, Boy! Ug pasayloa ko nga di ko makatuman sa gisaad ko nimo kanhi nga dili na ko mahigugma pag-usab sa usa ka lalake! Giisip ko si Lito nga mao ikaw, Boy...!”
May mga kamot nga miagbay kang Fe. Sa iyang pagyahat, nagpahiyom si Lito nga mikihat niya, nga midagkot usab dayon sa dalang dakong kandila, atubangan sa nitso sa iyang bana.
“Didto ko sa inyong balay ug nasayran ko nga sayo kang mianhi sa sam-ang, mao nga miapas ko nimo. Miduyog ko sa imong sayo nga panagkot, Fe, ning buntaga. Ning kasaulogan sa Kalagkalag, mananghid sab ko ni Boy, nga suod kong higala kanhi, nga magpakasal na ta aron hingpit ko na ikaw’ng maangkon, Fe...!” Hinay nga gikusnit ni Fe ang kilid ni Lito nga mibalik sa pag-agbay kaniya, ning puno sa gugma nilang dungang pagpanagkot sa sam-ang sa Carreta ning buntaga sa adlaw sa Kalagkalag. (Kataposan)