Doble ang pagpangga
Alas 6:30 sa buntag. Nagtaligsik. Usa ray pasahero karon sa traysikol nga gimaneho ni Junjun. Padulong siya sa merkado sa Carmen. Ganiha, may gihatud siya sa Puente. Pagbalik niya sa agi, may nisakay usa. Tungod sa bastap sa baryo, pikas, may nipara nga hamtong lalaki. Nagkawo.
Gipasakay niya. “Sakay lang ko, Jun. Kay nagtaligsik. Di maayo nga magpasingot unya mataligsikan” sa pasahero paghiluna sa wala tupad sa unang pasahero nga batan-ong lalaki. “Maayong buntag, diha, gaw. Ikaw man diay na”, ni Junjun. Nipahiyom. Mao pay pagkaila niya sa pasahero nga bag-ong nisakay, nga si Charlie, bana sa iyang ig-agaw nga si Sonia.
Hapit kada buntag, kun di lang mag-uwan, makit-an ni Junjun si Charlie nga mag-hike gikan sa Poblasyon ngadto sa Puente ug balik. Kanunay niyang businahan ug sampiton pa gyud.Karon pa si Charlie nakasakay sa traysikol ni Junjun. Nakadungog na siya gikan sa ubang drayber sa traysikol nga dagko og hinatagan si Charlie kun moplete. Labi na kun magpahatud sa iyang balay. Pero, madako man o magamay iyang iplete, nagplano si Junjun nga dili niya dawaton. Kay maayo kaayo og gawi si Charlie nga usa ka CPA.
“Ihatud ko sa amo, Jun. Doblehon nako akong plete”, ni Charlie. “Bisa’g wapa ka niingon. Maoy plano nakong ihatud ka. Labi na nga nikusog ang taligsik” ni Junjun.
“Salamat Jun, ha” ni Charlie paghunong sa traysikol tungod sa ilang balay. Nanaug ug nikuot sa iyang pitaka. Maglisod man siya’g kuot sulod sa traysikol. “Way sapayan, gaw. Adto na ko” ni Junjun. “Ayaw sa gaw. Wa pa gani ko kaplete” ni Charlie. Nibabag sa traysikol. “Way plete ang paryente, gaw” ni Junjun. Mapahiyomon. “Sayop nang imong hunahuna, gaw. Mopangga ko’g laing tawo, gaw. Pero mas labi gyud ang paryente. Ang laing tawo gaw, P25 ray akong iplete dinhi. Ikaw, kay paryente, doble gyud. Kay doble akong pagpangga nimo”, ni Charlie. Nipilo og singkuwenta pesos nga papel. Gisulod sa walang bulsa sa dughan sa polo ni Junjun. Wa siya kabalibad. Ug hilom siyang nangandoy nga modaghan unta ang sama ni Charlie. (Kataposan)
- Latest
