Nagsinulog ang drug addict

Maoy nasiplatan ni Elsie si Dave ning bisperas sa adlaw sa Sinulog nga nag-atras abante ang pagsadsad sulod sa siot ug nagdasok nga mga tawo sa Pilgrim Center sa Basilica Minore nga nagkupot og dinagkotang kandila nga giwarawara sa duha ka kamot.

Nagsinulog ang drug addict!

"Pit Senyor! Viva Senyor Santo Niño!  Alang sa akong pagbag-o! Pit Senyor! Viva Senyor...!"

Nasawod sa pandungog ni Elsie ang kusog nga singgit ni Dave nga padayong nagsinulog uban ang daghang mananabtan ug manindahay og kandila nga nagsinulog usab taliwala sa dasok nga manimbahay ug manghalokay sa imahen ni Senyor  Santo Niño.

Nakapanglingo si Elsie niadtong udtoha. Silingan niya si Dave sa ilang barangay sa Hipodromo. Iya sab nga katalirungan ug klasmeyt gikan sa elementarya ug hayskol. Apan wala na kini mopadayon og eskuyla sa kolehiyo kay nabuang sa barkada, sa pag-inom sa beer ug bino ug ang pagsuyop og shabu. Wa makadisiplina niya ang negosyante niyang mga ginikanan kay linga sa ilang negosyo ug gipatuyangan sa gusto kay kamanghurang anak. Hangtod nga nahimong drug addict si Dave. Nanguyab kaniya si Dave. Guwapo unta, apan maglagot siya kay usahay, mapraning ang sinultihan ug linihokan. Naapil nas tukhang, apan hilom gihapon nga mosuyop og shabu.

"Padilidili pa, pero ibog kaayo nako...!" mura'g wa nay buot manulti si Dave ilabi na kun high na kini sa shabu.

"Pagbag-o! Ayaw nag adik-adik! Padayon og eskuyla...!"

"He-he-he! Uyab na lagi ta...!" mora'g naglutaw sa kaugalingon si Dave.

Wala na makalikay si Elsie dihang miduol niya si Dave nga mihunong sa iyang pag-sinulog. Naaninaw niya nga presko kini'g dagway. "Els, nagsinulog ko, tungod sa akong gugma nimo! Basta uyab na ta, ha?...!" ni Dave nga prangkang mihunghong kang Elsie. "Saksi si Senyor Santo Niño sa akong pagbag-o na, sugod ning pagsaulog karon sa kapistahan niya ug sa Sinulog!"

Wa makatingog si Elsie. Igo lang siya mitutok kang Dave. Ug nagkatinutokay sila nga makahuloganon kaayo. (Kataposan)