Isaad nako kuya

Wala makatungha og kolehiyo si kuya Angel unsaon gud, wala na man kami ginikanan  Napugos intawon siya og trabaho og sayo.

Pinangga kaayo ko ni kuya. Sa dihang mangaon mi, among saw-an ang lamiang pagkaon. Hatagan usab niya ako sa akong gikinahanglan. Tungod sa iyang pagsuporta sa akong pagtuon, natapus nako ang akong high school.

"George, karon nga gradwado kana sa high school unsang kurso ang imong kuhaon?

"Kuya, gusto nakong mag seaman, apan nasayod ko nga dili sayon ang pagasto og kolehiyo." "George, ayaw og kabalaka, ako ang mogasto nimo. Andam nakong isakripisyo ang akong kaugalingon, tungod ug alang sa imong kaugmaon. Nagkasabot mi sa ate nimo Loren, nga unya usa kami magpakasal inig katapus nimo sa pagtungha. Magtambayayong mi sa paggasto nimo. Ang ako lang ihangyo nimo, nga motahod lang gyud ka nako ug magtarong ka sa imong pagtungha." O, kuya, makalaum ka nga magtarong ko."

Nagpa-enrol ko sa usa ka unibersidad. Maayo dinhi kay duol ra sa Cordova, sayon lang ang sakyanan padulong sa eskuwelahan ug pauli. Human makapaenrol gipalitan ko ni kuya sa tanan nakong gikinahanglan. Kadto nakadasig nako sa pagtungha. Ug nakasaad ko sa hilom nga kun matuman nako ang akong pangandoy, andam kong mobalos niya.

Gituman nako ang akong saad nga magtarong sa pagtungha,  hangtod matapus nako ang kursong Marine Engineering. Bespiras sa akong gradwasyon, miabot ang usa ka subong hitabo sa kinabuhi ni kuya. Nahilandig siya sa tambalanan. Nakigpinusilay siya sa mga tulisan nga buot motulis sa bangko nga iyang gitrabahoan. "George, pasayloa ko dong nga dili ko makatambong sa imong gradwasyon. Nasayod ko nga dili na ko magdugay. Palihog unya ko og atiman sa among anak nga gisabak ni ate Loren nimo. Panggaa siya sama sa akong pagpangga nimo." "Isaad naku kuya, nga mahalon ug panggaon nako siya sama sa imong pagpangga nimo nako."

Wala na si kuya Angel, apan ang iyang maayong  panig-ingnan nga iyang gipugas sa akong kinabuhi maoy himuon kong gabayan aron matuman nako ang akong gisaad niya.(Kataposan)