Panag-uli - Gula 146

"Sa tibuok kong kasing-kasing mama gipasaylo  na tika," matud pa ni Mylene nga wala kapugngi nakahilak kini apan ang paghilak dili tungod sa kagul-anan ug kasakit kun dili luha kini sa kalipay.

"Salamat ma kay nakaamgo na ka salamat kay miabot kining panahona sa atong kinabuhi, salamat kaayo," matud pa ni Ferdie nga migakos sa inahan.

"Pasayloa usab ko ma kun nganong nakabuhat mi si Ferdie sa paglimod nimo sa kamatuoran," matud pa ni Mylene.

"Sakto lang ang inyong gibuhat kay kun inyo pang gibutyag sa una pa lang nga wala pa mo maminyo wa unta koy mga apo karon nga si Kyle ug Diane," matud pa sa senyora nga mitulo ang luha.

"Ma ikaduhang higayon kini nga nakita tika nga mitulo ang luha," matud pa ni Ferdinand.

"Oo anak ang unang pagkakita mo dihang kataposan namong panagsulti ni Mylene natandog ko niadtong imong gipanulti pero padayon gihapon kong nagmatig-a," matud pa sa senyora unya mipuntarya ngadto kang Kyle, "Kyle apo sorry ha pasayloa si lola dako kaayo ko'g sala ninyo ni Pia." "Okay ra lola ang importante karon nga aduna na kitay pagsinabtanay," matud pa ni Kyle nga migakos sa iyang apohan.

'Andam kong modawat kang Pia apo dad-a unya siya sa mansiyon kun gusto kang magpakasal niya mogasto ko pero kinahanglang moundang siya sa iyang pagtrabaho sa club," matud pa sa senyora.

"Oo lola akong ingnon si Pia ug lola may problema dakong masakiton ang iyang papa," matud pa ni Kyle.

"Dili na angay'ng problemahon apo akoy moabaga sa tanang kinahanglanon sa pamilya ni Pia. Mohatag man gani ko'g milyones sa mga simbahan. Akoy bahala sa tanan ang inyong kasal unya ni Pia agi usab kini’g selebrasyon nga kitang tanan nagkauli. Kitang tanan nagsinabtanay ug nagpinasayloay," matud pa sa senyora nga dili matukib ang kalipay. Ug dili kabayran og salapi ang kalipay ni Mylene nga sa kataposan nahiabot kining maong gutloa sa iyang kinabuhi ang pagdawat kun si kinsa ug unsa siya kaniadto.

Tuod man gipahigayon nila ang kasal ni Kyle ug Pia ipon una sila pagpuyo ni Mylene sa panimalay niini samtang nag-eskwela pa si Kyle. Ang pamilya usab ni Pia tua gipapuyo sa balay ni Mylene sa Santander.

Hinatagan sa kinahanglanon samtang si Diane usab nangayo’g pasaylo sa iyang maguwang nga si Kyle ug ngadto sa iyang inahan nga ginganlan niya'g dili mao.

Puno sa kalipay ang kinabuhi ni Mylene human matribukar ang tanan ug human gihikap sa Ginoo ang kasing-kasing sa iyang ugangan ug sa iyang anak nga si Diane nga maoy usa sa nahimong hinungdan sa kagubot sa ilang pamilya. Wala magdugay nagsabak si Pia sa una nilang anak ni Kyle ug gihimugso napun-an og usa ka miyembro ang pamilya diin ginganlan kini nila og Erica. Gikuha sa ngalan ni Mylene sa iyang pagka Birhen sa Kalapokan. Nakaingon si Mylene sa kaugalingon nga ang iyang pagkalapokon nahugasan sa gugma ni Ferdinand may mantsa man apan hingpit kining nahanaw human mabutyag niya ang iyang tinagoan ug human usab madawat siya sa iyang ugangan.

Usahay ang tawo pilit nga molunang sa lapok aron kahatagan og katagbawan ang mga tawo nga bililhon alang kaniya. Usahay usab adunay mga sugilanon sa kagahapon nga kinahanglang itago tungod ug alang sa kaayohan sa hingtungdan apan matud pa dili mo mahimong komkomon ang aso hangtod sa hangtod kay mangita gyud kini'g paagi nga kini makagawas. Manghinaut nga kun mogawas man kanunay kang andam sa sirkumstansiya. Pagpinasayloay ug pagsabot ang gikinahanglan aron  maglakaw kita sa dalan sa kinabuhi nga malinawon ug malipayon uban sa mga mahal  sa kinabuhi. Ayaw lantawa ang dapit nga lapokon kun dili lantawa ang kaayohan nga nabuhat niya. Ayaw paghukom sa tawong anaa magtrabaho sa giingong hugaw kay wala ka masayod nga siya diay usa ka Birhen sa Kalapokan. (Kataposan)