Pagkaamgo - Gula 145

"Wowww,.. same reaction same facial expression nga-nga lang ang peg mga etch? Kalami rang picture-ran oy."  Ang bayot nga si Melche ang unang mikanaug sa sakyanan.

"Melche? Ikaw?" Nagdungan pa sila si Mylene ug Ferdie nga nangunot ang agtang nga hilabihan ang kahibulong.

"In chorus gyud? Kinsa pa man diay lain? Nia ang angel ninyo oy alangan man og demonya shofa ra oks barel kun demonya no ikses pa gyud," matud pa ni Melche nga miduol gitan-aw sa tulo nga nahibulong kun si kinsa ang ablihan sa driver sa back seat naghuwat kun kinsay mokanaug.

"Nganong sakay man ka sa sakyanan ni lola Tita?" paghung-hong pa ni Kyle kang Melche.

"Ganahan ra ko sa imong pagtawag nako'g tita," ni Melche pa nga mingisi ug nagkanayon "tan-awa lang ninyo kinsa mokanaug demonya na pero nahimong angel tungod ni oks barel," ni Melche pa. Maoy nakita nila nga mikanaug si senyora Conchita mapahiyomon.

"Mama?" wala makatuo si Ferdie sa iyang nakita. "Nahingangha man mo? Ako ni dali adto ta sa sulod magsultihanay dali Mylene, hijo, Kyle," pag-agda pa ni senyora Conchita.

Didto nasayran nila nga ang bana nga German ni Melche usa sa mga mamahimong kasosyo nila sa negosyo nga tukoron ngadto sa Germany didto sila magkita si Melche ug senyora Conchita sa San Remigio. Didto giasoy ni Melche ang kinatibuk-an nga kaagi sa kinabuhi ni Mylene nga gibunyagan niya sa ngan nga Erica. Nasayran sa senyora pinaagi sa pag-asoy ni Melche nga grabe ang unos nga nahiaguman ni Mylene sa iyang kinabuhi. Misulod man tuod siya sa club apan isip usa lang ka dancer. Saksi siya nga limpiyo ug nagpabilin si Mylene nga usa ka Birhen sa Kalapokan kay bisan kausa wala ug wala mahitabo nga mi-outing si Mylene og usa ka customer bugti sa pipila ka libo. Gisulti usab ni Melche ang kakabos ni Mylene. Napugos pagsulod sa pagka-dancer sa katarungan nga gusto niining patilawon og kaharuhay sa kinabuhi ang pamilya. Wala panumbalinga ang mga pagbiay-biay sa silingan lamang may ikabutang siyang pagkaon nga makatambal sa kagutom sa iyang pamilya ilabi na sa masakiton niining inahan. Gilakip pag-asoy ni Melche ang grabeng trahedya nga nahitabo sa kinabuhi sa iyang higala ang kamatayon sa iyang inahan ug pagkasunog paghurot sa iyang mga igsuon. Way kapin kun kulang ang pag-asoy ni Melche sa kaagi ni Mylene ngadto kang senyora Conchita.  Nasayran usab ni Melche pinaagi sa senyora ang susamang kahimtang ni Kyle nga nahigugma sa susamag pagkatawo ni Mylene.

"Ug violaaa!!! Nakumbinser nako ning imong inahan baby Andy," matud pa ni Melche.

"Sa dihang nasayran nako ang imong kaagi hija wala ko mahimutang gipakigsultihan ko ang parish priest didto sa San Remigio kalabot sa maong situwasyon. Gitambagan ko sa pari nga dili maayo ang akong gibuhat pagkadako nakong hungog. Nag-alagad tuod ko sa simbahan mahatagon sa unsay kinahanglanon sa simbahan pero wala ko makahatag sa kinahanglan sa akong anak ug kanimo Mylene, ilabi na nganha kanimo Kyle. Gamay  ra man unta diay ang kinahanglang ihatag ko kaninyo gamay'ng pagsabot nga akong gihikaw ninyo," matud pa sa senyora nga nabuka ang mata sa kamatuoran nga way pobre o adunahan kun paghukman na kita sa Kahitas-an. Dili diay mahinungdanon kun unsa ka kahugaw dinhi sa kalibutan basta ang intensiyon mo lang mao ang kaayohan sa daghan," matud pa sa senyora nga hingpit nang nausab sa paminaw nila ni Mylene ug Ferdie.

"Renewed citizen na ni siya aw renewed Christian diay buotan na siya gimilagrohan ni San Dayong ang patron sa mga bayot buang," matud pa ni Melche nga mibuhak-hak."Hija Mylene, ipaubos ko karon ang akong garbo kinahanglan gyud diay tuod nga dili ta magpakabuhi nga taas ang garbo kay kun unsa kataas mao usab kini ang pagkahagba. Pagkahagba ngadto sa kalayo sa empiyerno," matud pa sa senyora."Wow ganahan ra ko sa imong lingwa mother pang saint sya permanintiha ha," matud pa sa bayot."Mylene hija... Ferdinand, hijo, Kyle, mapasaylo ba ko ninyo sa dako kong sala nga nabuhat ninyo?" Sa senyora pa. (Sumpayan)