Panamilit - Gula 144

"Daddy," bugtong pulong agig tubag sa gisulti ni Ferdie.

"Nahimo kong hakog tungod sa gugma nahimo kong antagonista sa gugma ninyo ni Pia tungod sa imong lola. Nahibawo kong talawan ko kay dili ko gusto nga isalikway mo sa pamilya," matud pa ni Ferdie. Midugang sa pag-ingon, "pipila ka adlaw nga gihunahuna ko kini'g maayo nahisama ka tuod nako sakto usab si mama mo dili maayo nga sama sa akong gibuhat ililong kini ngadto kang lola mo kay sama namo ni mama mo mura mi'g naa sa usa ka halwa nga padayong gipriso ang kaugalingon. Gibilanggo sulod sa hataas nga panahon ang sekreto nga unta sa sinugdanan pa lang amo nang gibutyag dili unta kini maingon niini ang tanan.

"Nahitabo kini kay may rason nahitabo ang paglilong nato aron mahimugso ang duha nato ka mga anak nga bunga sa atong pagminahalay," matud pa ni Mylene.

'Apan, anugon kay si Diane wala maliwat nimo ling dili siya sama nimo nga buotan," matud pa ni Ferdie.

"Hinaut nga maka-amgo na siya nga dili maayo nga magminaldita," matud pa ni Mylene.

"Im sorry sa nabuhat ni daddy  nimo Kyle karon moingon ko nimo nga go ahead padayon sa imong paghigugma kang Pia. Dli kana makabati nako'g pagsupak sa inyong relasyon hinaut nga ikahimamat ko usab si Pia aron ipaabot ko kaniya ang dako kong pagmahay.

Nga makapangayo ko niya'g pasaylo daghan ko og nasulti nga dili maayo ngadto sa imong hinigugma bisan ug wala ko pa siya makita. Gipakaubos og maayo ang pagkatawo bisan og wala ko pa siya makita mapasaylo unta ko niya," matud pa ni Ferdie.

"Sige daddy ingnon nako si Pia ana nga nangayo ka'g sorry niya," matud pa ni Kyle.

"Ling sorry," ni Ferdie ngadto sa asawa.

"Kalimti na to ling," ni Mylene pa.

"Unya padayunon mo pa ba ang inyong desisyon nga magpalaayo?' matud pa ni Ferdie.

"Wa nay makapugong ling kinahanglang magpalayo una mi si Kyle wa ta masayod kun unsay lihok sa utok sa imong inahan. Nahadlok lang mi si Kyle nga dayonon niya ang iyang bahad nga patyon si Pia ug ang tibuok pamilya niini mas maayo na ang managana daan," matud pa ni Mylene.

"Mahimo mo ba akong tultolan sa inyong adtuan aron bisitahon ko kamo didto?" matud pa ni Ferdie.

"Dili pa sa pagkakaron ling paabota lang ang tukmang panahon," matud pa ni Mylene.

"Kinahanglang doble ingat mi karon dad basin og nay gisuholan si Lola sa pagpaniid namo. Kinahanglang dili mi niya matoltolan kami lang si Mama ug Pia ang nasayod sa dapit nga among adtuan," matud pa ni Kyle.

"Sige amping mo didto kanunay ug ling, tawag matag karon ug unya ha ba? Mingawon ko nimo ug kun mahimo duawa ko dinhi sa ato. Andam nga bukas ang atong panimalay sa imong pagbalik I love you Ling," matud pa ni Ferdie nga migakos sa asawa og hugot kaayo mibawos usab og gakos si Mylene.

"Pasensiya na ling nga buhaton ni namo paaboton nato ang panahon nga maoy magbuot I love you Ling. Bawnon nako sa akong paglayo ang dako kong gugma nimo," matud pa ni Mylene.

"I love you too Ling, unang higayon kini nga magkalagyo ta ambot kun mabuhi ba ko kun wala ka sa akong kiliran," matud pa ni Ferdie nga nanglugmaw na usab ang mga luha. Naggakos ang tulo ug nanamilit apan sa kalit lang nauwang sila gikan sa ilang panaggakos dihang may sakyanan nga naabot. Ang sakyanan ni Senyora Conchita apan mas nakurat pa silang tulo dihang nakita nila ang tawo nga maoy unang mikanaug sa sakyanan. (Sumpayaan)