Like father like son - Gula 138

"Ambot wala ko mahibawo kun kinsay nagsulti niya naglibog sad ko," matud pa ni Ferdie.

"Mas maayo nga nahibawo na siya aron dili na ko maglisud pa sa pagsulti nila ang pagtubag na lang unya nako ang akong andamon sa iya unyang mga pangutana lakip na ang pagdawat kun unsay ilang hukom batok nako," matud pa ni Mylene.

"Gikasab-an ko ni mama matud pa niya mangandam kuno ko inig abot niya dinhi busa ayaw paglakaw kay gusto sab ni mama nga nia ka inig abot niya," matud pa ni Ferdie.

"Mulakaw ko ug way bisan usa ninyo ang makapugong importante ang akong adtuon," ni Mylene pa dayong talikod nagdali nga migawas sa ilang panimalay wala mosakay sa ilang awto. Migawas sa gate nakahukom nang daan nga magtaxi na lang paingon sa Cebu City. Way nahimo si Ferdie nagsige na lang og pangagho mikanaug kay nakahuna-huna nga adto na lang sa study room maghuwat sa iyang inahan dihang hinay nga mikanaug sa hagdanan.

"Worried? Tsk tsk tsk.." tingog sa anak nga babaye'ng si Diane gilingi ni Ferdie ang nahimutangan ni Diane.

"Nia ka man lagi? Abi ba nako'g tua ka sa apartment?" ni Ferdie pa.

"Wa diay ka ingna sa imong asawa nga dili na ko mupauli didto? Dili na ko gusto nga makakita  sa akong igsoon nga salawayon liwat sa iyang inahan," matud pa ni Diane nga nakapakurat ni Ferdie, gihuwat si Diane nga maabot sa iyang nahimutangan.

"Unsa toy gisulti mo?" ni Ferdie nga nangunot ang agtang. "Mabungol gyud diay ang tawo no basta dunay sekreto?"  pulong pa ni Diane.

"Unsay buot mong ipasabot Diane?" pangutana pa ni Ferdie.

"Like father like son," ni Diane nga sarkastiko kaayo og tono. "Unsa ba nang gipanulti mo?" ni Ferdie nga medyo iritable na sa sinultihan sa anak.

"Kay unsa man diay ang akong gipanulti?" matud pa ni Diane. "Ayaw ko'g sumbalika'g pangutana Diane," ni Ferdie pa nga mitalikod aron muadto sa study room.

"Wa man ka makapugong sa imong asawa? Milakaw gyud bisa'g gipugngan nimo dili na ka makapugong niya ining higayona? Dili na imong tingog maoy iyang sundon?" matud pa ni Diane nga milingkod sa sala milingi niya pagbalik si Ferdie samtang giliso ang siradora sa study room.

"May importanteng adtuon si mama mo," matud pa ni Ferdie.

"Yeah, I know, right?" matud pa ni Diane nga mikuha og usa ka magazine ug mipakli sa mga pahina niini. Miduol kaniya si Ferdie.

"Nahibulong na ko nimo Diane unsa ba nang gipanulti mo? Unsa bay imong nasayran?" matud pa ni Ferdie.

"Everything," bugtong pulong ni Diane nga mipahiyom ug uga ug miyamiid pa dalang sulimbat sa mata.

"Nahibaw ko nga moadto ang imong buotang asawa sa liwat kaayo nimong anak nga si Kyle. Mag-abot sila sa apartment," matud pa ni Diane.

"Giunsa nimo pagkasayud?" ni Ferdie nga nangunot ang agtang.

"Ako pa? Bata pa baya kaayo ko wala pa ma deteriorate ang akong sense of hearing," matud pa ni Diane. "Nanawag si Kyle kang mama mo ug nakabati ka?" pangutana pa ni Ferdie mikatawa og kusog kaayo si Diane imbes nga tubagon ang pangutana namulong kini.

"Any moment from now muabot na si Lola tubaga unya ang mga pangutana ni lola mao diay nga wa gyu'y pagsupak si mama sa relasyon nila ni kuya ug sa prosti kay siya mismo usa sad ka burikat kanhi ug ikaw sad daddy mura ka'g si Kuya nga nahigugma og puta!" matud pa ni Diane nga way lipod-lipod. Nahingangha si Ferdie. (Sumpayan)