Hinugasan sa gugma - Gula 136

Medyo nahilaw si Ferdie sa pagkabati niya sa asawa.

"Mylene, please ayaw kana'g buhata ilubong sa kalimot ang imong kagahapon malinawon na ta. Dili ba?' matud pa ni Ferdie.

"Malinawon? Asa dapita nahimong malinawon kining pamilyaha Ferdie? Magmalinawon lang kini kun ang imong pamilya mosabot sa gibati sa atong anak," matud pa ni Mylene.

"Mobalik na ba sab ta ana?" matud pa ni Ferdie nga milingkod sa sofa ug dayon gihuboan ni Mylene sa iyang sapatos ang bana lakip na ang gisul-ob niining suit.

"Gituyo sa kahigayonan nga mahigugma si Kyle kang Pia nga naa magtrabaho sa club aron  pagpahinumdom natong duha nga may tinaguan ta nga angay'ng ibutyag gituyo sa Ginoo nga mahitabo kini aron paglingkawas gikan sa mangil-ad nga kagahapon. Dili magmalinawon ang akong kalag hangtod nga dili kini ibutyag sa imong pamilya," desididong pulong ni Mylene.

"Kun isalikway ka nila?" ni Ferdie pa.

"Kun isalikway ko nila wa ka lay buhaton? Dili ka makapanalipod nako? Pasagdan na lang sab ko nimo nga ilang isalikway?" Usa ka pangutana ni Ferdie nga gitubag og pipila ka pangutana.

"Mylene sabta ang sitwasyon," matud pa ni Ferdie.

"Taas na kaayo ang panahon nga nanglabay Ferdie, sulod sa mga katuigang nanglabay padayon tikang gisabot. Hangtod ba sa kataposan sa akong gininhawa gusto ka nga ikaw lang ang kinahanglang sabton? Dili ba diay mahimo nga sabton sab ko nimo ining higayona? Usa ka higayon lang ang gipangayo ko nga pagsabot Ferdie. Hatagi sab ko'g higayon aron imong sabton nahimo kang selfish kun ikaw lang ang perming sabton," matud pa ni Mylene.

"Wala ka pa masayod kun unsay mabuhat sa akong mga ginikanan kun masayod sila sa tinuod," matud pa ni Ferdie.

"Pagsalikway? Andam na ko ana sa laing bahin pila na ba diay ta ka tuig nga kasal Ferdie? Kapin sa 20 ka tuig. Sulod nianang mga tuiga dili pa ba ko masayod kun unsa ang imong mga ginikanan? Nasayod na ko kun kinsa ug unsa sila ilabi na'g masuko. Nasayod na ko kun unsay gahom sa imong pamilya ining katilingbana Ferdie, busa dili mo na angay isulti nako nga wala ko masayod kun unsay mabuhat sa imong pamilya. Ang pagsugo'g mga tawo aron ipapatay ang usa ka tawo? Ang pagsugo'g mga tawo aron pagguba sa usa ka negosyo sa usa sa inyong competitors? Way nalilong nako karon kun unsay ilang buhaton nako andam na ko wa ko mahangol sa inyong bahandi. Kun unsay mahitabo human ko ibutyag ang tanan andam na kong mobiya sa kinabuhing haruhay nga imong gipatagamtam nako. Salamat kay usa ka higayon o sa hataas nga panahon gipatagamtam mo nako ang kaharuhay nga wala ko matilawi sa bata pa ko. Salamat sa imong gugma nako nga maoy naghaw-as nako gikan sa lapok," taas nga pulong ni Mylene.

"Oo, naa ka sa lapok mabuhi kaniadto apan usbon ko sa pagsulti ang nasulti ko na kaniadto usa ka ka-Birhen sa Kalapokan Mylene. Gihugasan na tika sa akong gugma limpiyo kana tungod sa dako kong gugma nimo," matud pa ni Ferdie.

"Wala nimo malimpiyohi sa hingpit ang akong pagkalapokon Ferdie, ayaw pag-ingon nga gilimpiyohan ko nimo gikan sa pagkabulit sa lapok kay ang pagtago ta sa kamatuoran mao ang matsa sa akong kagahapon may nagpabilin gihapong hugaw sa akong pagkatawo," matud pa ni Mylene.

"Ug maoy pagtoo mo nga hingpit kining malimpiyo kun ikabutyag mo ang imong tinuod nga pagkatawo ngadto sa akong mga ginikanan?" ni Ferdie pa.

"Oo Ferdie," tubag pa ni Mylene nanghupaw si Ferdie.

"Mohangyo lang unta ko nimo nga unya na lang nimo sila sultihi sa imong plano human sa pagahimuon nga salo-salo sa resort ugmang adlawa," matud pa ni Ferdie.

"Ugmang adlawa mao ang pagbuto sa akong baho," desididong pulong ni Mylene. (Sumpayan)