Gula 132
Nahingangha nga nagpanghikap sa iyang aping si Kyle nga naigo sa sagpa sa apohan unang higayon nga napasakitan siya sa iyang lola.
"Imo kong gisagpa lola?" ni Kyle pa.
"Kuwang pa man gani na kay bakakon kang dako molimod pa gyud ka?" matud pa ni Diane.
"Wa ko magtuo nga gipadako ka sa imong inahan nga bakakon Kyle," matud pa sa senyora.
"Kay na in-love man og hustler natakdan adtong Pia sige pa lola di pa igo ang sagpa para anang bakakong dako matinumanon sa gusto," ni Diane nga nagsige'g siba sa apohan. "Kun magpadayon kanang imong kabuang uban anang babayhana Kyle, magmahay ka lang unya," matud pa ni Senyora Conchita.
"Dili ko mahimong mahayan ang paghigugma ko sa babaye nga natingban nako sa tanan lola," matud pa ni Kyle.
"Nakabati ka lola? Maayo na kaayong motubag-tubag nimo," matud pa ni Diane.
"Sultihan tika Kyle, way malilong nako tanan nimong gibuhat nasayod ko," matud pa sa senyora. "Kay duna may tigbalita nimo kinsa lola?" ni Kyle pa nga mitan-aw kang Diane. Nasayod na ang lalaki nga si Diane ang tigbalita sa apohan kun unsa may mahibaw-an niini didto sa ila.
"Tan-aw man ka nako? Nagduda ka? Kun nagduda ka hala ipadayon," matud pa ni Diane.
"Siguro mas maayo tingaleng masayod ka nga unang adlaw pa lang nga nakiglambigit ka anang ginganlan og Pia nga hapit na lang ibaligya ang kalag sa demonyo nasayod na ko," matud pa sa senyora.
"Ikaw gyud diay Diane ang tigbalita ni Lola, ikaw ang tigpaniid sa kalihokan sa balay," ni Kyle nga nagpangagot mikatawa og kusog kaayo si Diane
"Well di na lang nako na ideny yes na yes tanan ako'y nagsulti kun unsay akong mahibaw-an, madunggan, inyong mga sekreto, mahibawo si Lola, si Lolo ug si Daddy ako ang source sa tanan kuntento kana?" matud pa ni Diane nga nakapasamot sa kalagot sa lalaki.
"Nahimo kang espiya sa balay ngadtong lola ug ni daddy," matud pa ni Kyle sa manghud.
"Mismo!! May katungod sila nga masayod ikaw nag secret-secret pa kang buanga ka pero wa nimo hunahunaa nga way aso nga makumkom. Utro pud ni si mama kaalyado ining tawhana lola kaalyado lakip kang Pia nga burikat!" matud pa ni Diane. Wa na lang motingog pa si Kyle. Nasuta nga si Diane gyud diay ang source sa tanang impormasyon nga masayran sa iyang apohan ug sa iyang amahan. Midugang pa sa pag-ingon si Diane, "wa kanay lusot wa na moy lusot si mama. Ayaw mo pagnigar kay klaro kaayo inyong pagpamakak bisa'g unsaon ninyo'g tago pero ang kahigayonan diri mopabor nako kay matag estorya nga inyong gisekreto, dili nako tuyuon nga makadungog ko magpahipi ko aron duna ko’y ikabalita ni lola. Angay man sang pahibaw-on si Lola," matud pa ni Diane nga sa tan-aw ni Kyle, mura'g demonya nga mapahiyumon.
"Wa kay sama ka salbahis Diane!" Pagpaminti ni Kyle."Dili dautan ang gibuhat ni Diane Kyle," sa senyora pa."Unya lola unsa may silot ini ron nga ihatag mo ining bakakong dako? Matinumanon sa gusto! Ayaw paglangan lola kuha-i na siya sa katungod sa imong katigayonan dili siya angay nga bahinan kay masinupakon siya," matud pa ni Diane.
"Wa ko mahangol sa inyong bahandi inyo nana way makapugong sa akong paghigugma kang Pia bisan pag ikaw lola," matud pa ni Kyle nga hugtanon sa iyang desisyon.
"Senyora nia ra ang yawe sa usa ka awto nga..." pagduol sa usa ka hamtong nga lalaki nga wa matiwas ang buot isulti pagkakita niya kang Kyle.
"Ikaw?" Pagkasiga sa mata ni Kyle, mitan-aw sa apohan nga ang mga mata daghan og mga pangutana, "unsay buot ipasabot ini lola? Siya, siya ang nahimong customer ni Pia sa club ug siya usab ang lalaki didto sa atong resort. Unsay buot ipasabot niini lola? Unsa!?" Ni Kyle pa nga mura'g wala makasabot sa gibati. (Sumpayan)