"Hingpit na ang akong pagduda," ni Kyle pa.
"Nga unsa?" pangutana pa ni Mylene nga naa sa pikas linya.
"Si daddy ang nagmaniubra niining tanan siya ang nanghulga kang Pia nga patyon kun dili ko palay-an, siya ang utok sa tanan," matud pa ni Kyle.
"Giunsa mo pagsiguro?" laing pangutana sa inahan. Apan gisiko ni Pia ang hinigugma gitudlo ang tawo nga miambo sa veranda nga nag-utabang sa dagat. Gipislit ni Kyle ang end call sa iyang cellphone aron tan-awon ang gitudlo ni Pia.
"Tan-awa Kyle tawo nga nag-ambo didto sa dagat," matud pa ni Pia nga pwerti nang kulba.
"Siya kana," ni Kyle pa nga mi-aksiyon paggawas gikan sa awto. "Kyle ayaw paggawas," pagpugong ni Pia sa hinigugma.
"Ha? Ngano man? Gusto kong sak-on sila gusto kong ipabubo ang tanan kong kalagot kang daddy," matud pa sa lalaki.
"Ayaw paggawas utang buot mamalik na ta sa atong agi Kyle tan-awa gipagawas niya ang iyang pistola ug gitrapohan sa iyang panyo," matud pa ni Pia. Wala madayon ang paggawas ni Kyle sa awto. Giobserbaran lang sa duha ang gibuhat sa hamtong nga lalaki nga nanigarilyo diha sa veranda may gikuot ang maong lalaki. Cellphone may nanawag ug gitubag niya kini milakaw ang lalaki ug wala na nila kini makita.
"Dinhi ka lang mogawas ko maniid ko ayaw kabalaka nako gusto lang gyud nakong konpirmahon nga naa gyud diha si daddy okay? Matud pa ni Kyle miuyon na lang sab ang dalaga.
"Pag-amping intawon Kyle," matud pa ni Pia.
"Dili ko unsaon ana niya naa si daddy sige diha ka una," ni Kyle dayon migawas sa awto ug hinay nga gisira pagbalik ang awto. Mainampingon nga mitikang paingon sa sulod ang ulitawo. Inanay niyang nabati ang tingog sa maong lalaki nga nakigsulti sa cellphone. Nagpahipi si Kyle sa may haligi diin makita na niya ang nahimutangan sa maong lalaki. Gisuhid niya ang palibot apan wala siya'y nakitang laing tawo gawas lang sa maong hamtong nga lalaki nga nakigsulti sa cellphone niini naminaw si Kyle sa maong lalaki nga nakigsulti sa pikas linya.
"Sorry kaayo wala gyud nako madala ron...... mao lagi unta kataposan na unta niya ron pero bisag unsaon nako'g tingal og dakong kantidad nagdumili gyud nahibawo ko. Dako ka'g gibayad nako ayaw kabalaka mabuhat nako ang imong gimando nako nahibawo ko nga dako ka’g gibayad nako. Ipaniguro nako nga mahanaw siya ning kalibotana. Okay taud-taud mopauli na ko nagpahangin lang diri sa inyong beach house. Inom og usa ka botelyang beer.
Mopauli na ko ron taud-taud wala oy haahahaha wala intawon ko magdala'g babaye diri oy ako ra usa," matud pa sa lalaki. Naglibog na si Kyle sa nabati nag-inusara lang diay ang maong lalaki nahunahuna nga wa man sad diay tuod laing sakyanan nga maoy sakyanan sa gidudahang uban sa maong hamtong nga lalaki.
Dihang nahinumduman niya nga taud-taud mupauli na ang maong lalaki dali kining mibalik sa sakyanan misulod sa awto nga mainampingon.
"Kyle unsa na?" ni Pia pa "naglibog na ko," matud pa ni Kyle dayon mipaandar sa sakyanan ug migawas gikan sa resort nakita nila nga mao say paggawas sa maong lalaki. Migukod pa kini nila apan wala na sila maapsi pa. Dihang naa na sila sa highway paingon sa siyudad.
"Kyle, Kyle nahadlok ko," matud pa ni Pia.
"Kinsa man kaha kadtong gikasulti adtong maong lalaki sa iyang cellphone? Si Daddy wala didto sa resort kun mao pinaagi lang sa pagtawag ni daddy ang pagpakigsulti niya sa iyang binayran makita ni daddy kun mupauli ko sa balay," naminti sa kasuko ang ulitawo.
"Ngano Kyle unsay buhaton mo ha?" pangutana pa ni Pia apan sa kalit lang, miring ang cellphone ni Kyle nakurat kay ang nakarehistro nga number, numero sa iyang Lola Conchita. (Sumpayan)