Pag-alkontra sa plano

Gula 128

"Sigurado ka ma nga imong sultihan sila si lola mahitungod sa imong pagtrabaho sa club?" matud pa ni Kyle. "Oo anak bug-os na ang akong hukom," matud pa ni Mylene.

"Angay nga mubilib pa sila si Lola nimo kay tungod sa maong pagtrabaho sa club  way laing lalaki nga nakahilabot nimo gawas kang daddy. Usa pa tungod sa pagtrabaho mo sa club nahimo kang professional wala masayang ang imong pagpaningkamot. Gitawag ka man nila og babaye nga nabuhi sa lapokong dapit  pero angay kang panag-ingnan sa uban," matud pa ni Kyle.

"Sama kang Pia naa man sa club magtrabaho angay sab siyang panag-ingnan sa uban kay may mga tawo siyang gisalbar gikan sa kagutom ilabi na ngadto sa iyang amahan nga dakong masakiton," matud pa ni Mylene diin mipahiyom lang si Pia.

"Kanus-a mo man sila sultihan sa tinuod ma?" ni Kyle pa.

"Sa mas labing daling panahon," tubag pa ni Mylene.

Unya didto sa ilang balay. "Unsa? Nabuang kana ba Mylene? Dili ka pwedeng musulti ngadto nilang mama nasayod kana sa batasan sa akong inahan kaniadto pa," matud pa ni Ferdie nga dakong supak sa gusto sa asawa. "Desidido na ko sa akong hukom Ferdie," matud pa ni Mylene.

"Hunahunaa ang imong propesyon maestra ka masayran usab nila kun unsa ka kaniadto hunahunaa nga nahimo kang ehemplo sa mga kabataan kay maestra ka," matud pa ni Ferdie.

"Andam kong isakripisyo ang akong propesyon lamang mabutyag ko ang matuod ngadto sa imong pamilya. Andam na ang tanan kong pag-resign sa pagka maestra," matud pa ni Mylene.

"Wala ka ba mahadlok nga isalikway ka sa akong mga ginikanan? Wa mo ba sab mahuna-huna nga lakip ako kakuhaan sa katungod sa ilang katigayonan ug isalikway usab nila?" matud pa ni Ferdie.

"Andam na ko kun unsay ilang aksiyon nga buhaton kun makadawat sila sa akong kagahapon mas labing maayo apan kun dili okay ra. Dawaton ug magpalayo uban sa akong mga anak," matud pa ni Mylene.

"Mylene" bugtong pulong sa bana.

"Kinahanglang maisogon ko karon nahibawo ko nga gipakatawo ko nga dili sayon tandogon sa mga pagsulay. Nahibawo ko kun unsa ko kalig-on apan nahimo kong talawan tungod nimo nahimo kong talawan tungod sa dako kong gugma kanimo Ferdinand. Busa sorry buhaton ko na ang angay’ng buhaton.

Ug dili kana makapugong nako niining higayona," matud pa ni Mylene. Naglingo-lingo na lang si Ferdie sa gusto sa asawa.

Samtang sa laing bahin nianang pagkagabii  mitrabaho si Pia sa club mibalik ang suki niyang customer nga matud pa adunahan ug negosyante. Gusto niini nga i-out na usab siya apan mibalibad ang babaye apan mapugsanon kaayo kini apan hugtanon usab nga mibalibad si Pia. Way nahimo ang customer dili sab makapugos ang manager nga paubanon si Pia sa maong lalaki. Bisan pag-gitanyagan kini’g dakong salapi ug bisan sa kataposang higayon na lang nga mukuyog siya sa maong hamtong nga customer nga matud pa adunahan ug negosyante.

 Pagka off duty na expected na ni Pia nga nag-atang kaniya ang hinigugmang si Kyle giasoy ni Pia ang mahitungod sa lalaki nga hamtong nga nahimo niyang suki nga gustong makig-out kaniya. Nagpasalamat ang lalaki sa babaye kay wala kini magpadala sa dakong kantidad.

Samtang nagsakay sa sakyanan ni Kyle nakahuna-huna ang lalaki nga adto sila magpalabay sa oras sa ilang beach resort sa norte dihang nahiabot na sila sa maong resort nakugang si Pia sa iyang nakita.

"Kyle, nakaila ko sa tag-iya nianang sakyanan nga naka-park sa inyong grahe ang sakyanan kana sa nahimo nakong suki sa club," ni Pia pa nga nahasiga ang mata. (Sumpayan)