Love story

Dear Banat News Hugyaw,

Maayong adlaw sa tanang readers sa paborito nako nga Banat News! Ako diay si Amanda, 26 years old ug taga Mandaue,City. Ako lang i-share akong lovelife  nga nitiurok dili pa lang dugay hehehe. Pito ka buwan nako nga single ug ako lang isaysay ang kaagi nako sa katapusan nako nga nauyab nga si  Chris. Pareha ming duha nag-work sa restaurant ug ang among trabahoan naa diha sa IT Park.  Mahiligon ko og guy nga maayo kaayo makisama sa daghang tawo ug jamming ikauban ug usa sa rason nga na-inlove gyud ko kang Chris kaniadto. Sa tinuod lang nagkauyab ming Chris niadtong 2012, nagbuwag pag-2013, ug pag-abot niadtong  December 2015, nagbalik ming duha.

Seguro nituo mi kaniadto sa panultihon nga lami daw feelings kung magbalik mo sa imong ex. Nagkabuwag mi kaniadto tungod sa among ka-busy ug wala gyud mi klarong closure. Pero among panagbalik sa miaging tuig naganahan ko og maayo niya ug pareho ming duha nga kahibalo na mobalanse sa among oras sa trabaho ug sa among relasyon. Nisugot ko nga magbalik mi kay nabantayan man pud nako nga nagka-mature na siya ug lipay na lang pud ko kay dili kaayo grabe ang pag-adjust kay nasuweto na baya ko sa iyang pagkatawo.  Sa among panagbalik grabe kanindot ang dagan sa among relasyon. Nindot pa gyud kaayo ang feelings kay nasuod na ko sa iyang pamilya. Ug siya pud kay pinangga pud sa akong pamilya.

Makaingon na lagi ang uban nga kasal na lang ang among kuwang pero igo ra mi mokatawa kay dili pa mi andam sa maong butang. Kinahanglan pa nga magtigom og maayo ug naa pa baya mi ubang prayoridad sa among kinabuhi. Pero pag-abot sa March, nahibulong ko mura’g kalit man nibugnaw ang tinagdan ni Chris kanako sukad siya nabalhin og laing branch.  Nahimo siya nga manager sa laing branch ug panagsa na lang siya makigkita nako kay grabe daw ka puno sa iyang schedule tungod sa kadaghang gimbuhaton.  Ako lang siya permi gisabot usahay maghilak na lang ko sa hilom. Dili dayon ko basta makapangaway niya kay dili ko gusto maapektohan ang among relasyon. Apan pag-abot sa July, nagkagrabe na man ang sitwasyon mo-text ra man siya kun ako ang una mo-text.  Hangtod naabot nako ang istorya nga duna diay laing gikalingawan nga babaye si Chris. 

Pag-una, wala gyud ko mutuo hangtod sekreto ko nga nibisita sa laing branch kun diin na-assign si Chris. Gitayming gyud nako nga moadto kanang padung na manira ang restaurant.

Nitago ra ko sa gawas ug  wala kapugngi pagtulo sa akong luha sa dihang nakit-an nako si Chris nga dunay ka-holding hands nga girl paggawas niya sa iyang gitrabahoan. Wala nako moduol kay dili ko ganahan og eskandalo ug igo na lang ko ni-text niya nga putlon na ang among relasyon ug ako siya gisultihan sa akong nakita ug igo ra siya nangayo og sorry. Wala koy mabuhat bahala’g sakit, apan kinahanglan nga magbuwag mi kay dili ko ganahan og lalaki nga dili loyal sa iyang uyab.  Mo-request lang ko sa lyrics sa I Love You Goodbye by Celine Dion.

Hi Amanda! Thank you so much sa imong LOVE STORY! Paabuta ugma puhon ang imong request.

Dear Kalandrakasers, aduna ba kamo'y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa. Mahimo sab nga pinaagi sa snail mail. Ang atong address mao kini:

Love Story

C/o Banat News  Corner V. Gullas and D. Jakosalem Streets Barangay Sto. Niño  6000 Cebu City, Philippines