Pag-asoy ni Mylene sa anak - Gula 127

"Nganong nakaingon ka man nga kami gyud si Kyle ang magkadayon ma'am?" pangutana pa ni Pia,"sama sa amahan ni Kyle, ang babaye nga iyang pagadad-on dinhi mao gyud ang babaye nga dad-on niya sa altar sa kaminyuon. Managsama gayud sila si Kyle ug si Ferdie.  Ang imong kinabuhi Pia, dili gyud layo sa akong kinabuhi," matud pa ni Mylene mitan-aw ngadto sa layo. Mipahiyom. Mitan-aw sa anak, "Ma? Gusto kong masayran ang tanan ang sekreto sa imong pagkatawo ipasalig ko kanimo nga dili mausab ang dako kong respito nimo ma," matud pa ni Kyle nga migunit sa kamot sa inahan.

"Panahon na nga ibutyag ko ang angay ibutyag kinahanglang mogawas ang tinaguan nga dugay ko nang gitipigan. Ikaw ang una kong sultihan niini Kyle ug ikaw Pia ang mamahimong saksi sa pagpagawas ko sa dunot kong kagahapon," pasiuna pa ni Mylene.

Tuod man giasoy ni Mylene ang matuod niyang pagkatawo lakip na ang iyang kinabuhi uban sa iyang pamilya ang kasakit ug ang kalipay nga gidulot sa lalaking iyang gimahal ug maoy mihaw-as kaniya gikan sa dapit nga lapukon. Nasayran usab nila nga sa maong resort gitugyan ni Mylene ang iyang gugma kang Ferdinand.

Samtang nag-asoy si Mylene wala kapugngi ang mga luha ni Pia, miagas kini dungan sa pag-agas usab sa mga luha ni Mylene. Nanumbalik na usab ang tanan diha sa iyang panumduman. Kun giunsa niya aron makasugakod sa grabeng pagsulay nga iyang nahiaguman sa bata pa lang gisakit na apan nagpasalamat kay may lalaking tinuod nga nahigugma kaniya nga mao si Andy kon Ferdinand. Gisultihan usab niya si Kyke ug Pia sa hinungdan kun nganong hangtod niining panahona gitago nila ni Ferdinand ang matuod ngadto sa iyang pamilya sa katarungan nga nahadlok si Ferdinand nga isalikway si Mylene sa mata pobre niining inahan ni Ferdinand.

Kay kun mahitabo nga masayod ang apohan ni Kyle sa tinuod niining trabaho ug unsay kagikan niini sigurado man gyud nga ipalayo nila si Ferdinand kang Mylene ug kini ang dili katugotan ni Ferdinand nga mahimuwag sa babayeng natingban niini sa tanang pagmahal. Daghan pa ang gisulti si Mylene nasayran nila ang kinatibuk-an sa kinabuhi ni Mylene namahid sa iyang luha ang inahan.

"Nakasabot ko nimo ma bisan gamay wala mausab ang akong pagsalig nimo isip inahan ug labaw sa tanan sa akong paghigugma ug respito nimo. Mas mibilib pa gani ko nimo karon," matud pa ni Kyle salamat anak. Nahibawo kong lapad ang imong pagsabot nahibawo ko nga dili ka sama sa uban nga miyembro sa pamilya," matud pa ni Mylene. "Nakadayeg kaayo ko nimo ma'am kaisog nimo tingali kun ako pay nahitumngan sa imong kaagi dili siguro ko makahimo sa pagpakabuhi pa dili ko sama nimo nga isog talawan ko angkunon ko kana," matud pa ni Pia.

"Nganong nakaingon ka man nga talawan ka? Sa imong gibuhat alang sa imong pamilya igong basihan na kana aron tawgon ka nga isog nga pagkatawo. Dili daling mapukan sa mga pagsulay," matud pa ni Mylene nga mihikap sa abaga ni Pia.

"Dili ma'am talawan ko kay kun dili pa ko talawan dili ko magpadala sa pagpanghulga sa tawong hangtod karon wala ko pa mailhi," matud pa ni Pia.

"Pagpanghulga? Kun mao sakto gyud diay mi nga naay nanghulga nimo sultihi mi kun kinsa Pia," matud pa ni Kyle. "Wala ko mahibaw kun si kinsa kay sa telepono ko lang kini mabati sa mga text messages apan ayaw'g kabalaka sultihan tika kun si kinsa kun ugaling mamatud-an ko kun kinsa kining nagsige'g panghulga nako," matud pa ni Pia.

"Paningkamotan ko nga matribukar kining tanan apan niining higayona unahon ko una pagtribukar ang kaugalingon kong tinaguan," matud pa ni Mylene. "Unsay buot mong ipasabot ma?" pangutana ni Kyle, "kinahanglang masayran sa tibuok pamilya kun unsa ug kinsa si Mylene sa kaniadtong panahon nga si Mylene may dunot nga kagahapon nga pilit nga gitago sulod sa hataas nga panahon," matud pa ni Mylene. (Sumpayan)