Nag-ila sa Diyos
Alas 7:30 sa buntag nia na sab ang motorsiklo ni Victor sa daplin sa karsada naghulat og pasahero. Gigamit niyang habalhabal ang motorsiklo nga iyang napalit aron may ikabayad siya sa binulan nga installment. Paborito ni niyang parkinganan ang kasadpang habig sa coastal road sa Tayud, Liloan. Daghang paktori dinhing dapita ug kasagaran niyang mga pasahero mga trabahante.
Unya may nakit-an siyang Izuzu Crosswind nga puti, nagdagan padulong sa Mandaue. Nahibulong siya kun nganong lapad tan-awon ang sakyanan. Abli diay ang tuong pultahan dapit sa luyo, wa kamatikod ang drayber nga abli o nalimot ba kaha sa pagsira.
Gibati’g kahadlok si Victor nga madisgrasya ang Crosswind. Maluoy sab siya’s drayber niini o sa tag-iya nga makompromiso huma’s disgrasya. Giatngan niya kun moduol na o matungod sa iyang giparkingan.
Nahinumdom na siya nga kining Crosswind murag kada buntag tungod sa poste mga usa ka gatos ka metros sa wa pa iyang parkingan muhunong, dayon mangihi ang drayber tungod sa tuong kilid sa sakyanan. Ablihan niya ang panid sa pultahan aron masalipdan iyang lawas samtang nangihi. Seguradong nakalimot og sira sa pultahan ang maong drayber, guwangon na man gud mga sayisintahon na ang hitsura.
“Abli, Sir imong pultahan!, singgit ni Victor paghitungod sa Crosswind sa iyang gibarogan. Gikusog gyud niya iyang tingog, nangugat iyang liog. Nakalingi ang drayber niya, nanigang mga mata. Pagkamatikod nga abli ang pultahan sa iyang gimanehong sakyanan daling nipadaplin ug nihunong. Nisaylo ni Victor og mga trayenta metros. Nanaug ang drayber gilamba niya’g kusog ang panid sa pultahan nga abli.
“Salamat kaayo, Dong!” singgit sa drayber, nagwarawara ngadtong Victor. Niwarawara na lang og bawos si Victor wa na siya nisinggit kay nisakit iyang tutonlan. Nibalik ang drayber og sakay. Niarangkada ang Crosswind, nagkalayo ug gisundan ni Victor og tan-aw.
Nakapahiyom siya nga nagpanglingo. Nahimuot nga nakabuhat og matarong. Way laing tawo nakakita sa iyang gibuhat. Apan wa gyud niya palabya ang higayon nga makatabang sa isig katawo. “Bisa’g habalhabal drayber lang ko, nag-ila gihapon ko’g Diyos,” tuaw niya sa hilom. (Kataposan)
- Latest
