Naglagot ang engkanto sa pagluib ni Asiong

Dinhi sa balangay sa Tigpuwak dunay istorya nga hangtod karon dili pa mahanaw sa hunahuna sa mga lumolupyo.

Matud pa anak kuno sa adunahang engkanto nga si Doña Pacifica ang nagpakamatay sa linaw, ug tungod niini mikaylap sa tibuok balangay ang sakit  nga kolera ug daghan kaayong nangamatay. Kasagarang mangamatay mga batang lalaki. Maong naghimo dayo'g mga lakang ang taga munisipyo aron masumpo ang maong mikaylap nga sakit pinaagi sa usa ka medical mission. "Dok, abi nimo, duna miy gikatingad-an dinhi, ug anaa dinha sa dakong akasya atbang sa linaw. Matag Biyernes gyod makadungog mi'g dunay magkantakanta nga mora'g kanta o mensahe sa patay. Ug unya madungog dayon namo ang makapakitbi sa atay nga sonata," ni Teresita pa nga manghod ni Asiong. Si Asiong usa ka ambongan nga manananggot nga dunay hinigugma nga engkantada. Nahigugma kuno ang engkantada kang Asiong ug maong matag takdol sa buwan dunay makakita sa duruha nga magsayawsayaw sa tampi sa linaw."

"Mao ba," ni Doktor Tangko nga mora'g gibati'g kakulba. Mahilig si doktor sa mga istorya bahin sa mga engkanto ug motuo siya nga mga engkanto ang nadungog ni Teresita matag Biyernes sa gabii. Ug kay dinha man sila si Doktor Tangko moistar sa barangay hall, nakalugar siya sa pagsuroysuroy sa linaw. Kuyog niya si Teresita.

Unya usa ka hapon may usa ka guwapang babaye ang mianha sa barangay hall ug nangita kang Doktor Tangko. Ug dihang nagka-istoryahay ang doktor ug guwapang babaye, nasabtan ni Doktor Tangko nga usa kini ka engkantada, busa, "A, kining, ma'am, luoy kaayo ang mga lumolupyo ug naapil sa pagkamatay ang mga inosenteng bata."

"Sige lang, Doktor, kay akong ingnon si mama nako Pacifica nga hunongon na ang pagkaylap sa kolera," ug milakaw kini ug may makahuloganong tinan-wan ang gibilin diha sa doktor.

Tuod, matag Biyernes, mao nay makita sa mga lumolupyo si Doktor Tangko nga nakigsayaw sa guwapang engkantada sa tampi sa linaw. Igsoon sa nagpakamatay'ng engkantada diha sa linaw kining nahimong hinigugma karon ni Doktor Tangko. (Kataposan