Sulagma nga nagkaabot ang duha ka mutsatsa nga libakera sa plasa sa lungsod sa Amiraw. Gitugtan silas mga amo nga mosimba. Kay alas diyes pa ang misa ug sayo silang gipalakaw, nagpalabay sa oras sa plasa.
"Kumusta na man si Mildred? Nanganak na?" ni Dory pa. "Wa pa. Pero gipalayas nas balay iyang giabangan kay wa na kabayad," ni Letty nga nagtalikod sa fountain nga technicolor ang suga.
"Ang nakapamabdos diay niya? Wa diay niabang?" "Nipauli man sa iyang pamilya sa Mindanao. Minyo man diay tong lalakiha". "Nasayod man siyang minyo ang lalaki. Amiga man gani niya ang asawa. Kababata man sila sa Manucan, Zamboanga del Norte".
"Mao ba? Iya gyud diay'ng giapas ang lalaki dinhi aron magkarelasyon sila". Nagsekyu man sa usa ka paktori dinhi ang lalaki. Si Mildred nagpa-maid sa usa ka balay duol sa paktori. Pagkasayod sa amo nga mabdos siya nga way bana, gipapahawa".
"Hain na man siya puyo ron?" "Gisagop sa silingan nga biyuda nga way anak," ni Letty pa. "Unsaon, gugma man gyud kono, ni Mildred pa. "Iyang utok naa nas bilahan". "Kaniadto maoy moingon ang gugma buta. Karon, di kay buta lang, buang pa gyud," padayon ni Letty.
"Hi Dor!" tingog sa lalaki gikan sa likod ni Letty nga nag-atubang ni Dory. "Tana, manimba na ta!" sa lalaki. "Oy, Let. Ilaila mo ni Hernan, akong boyfriend" ni Dory.
Gikulbaan si Letty kay sinati niya ang tingog sa lalaki. Gilingi niya si Hernan. "Oy! Si Hector man ni. Boyfriend man sab nako ni!" ni Letty.
Nanigang mga mata ni Hernan/Hector kay nag-abut iyang duha ka uyab. Wa siya kamatngon ni Letty kay nagtalikod og medyo ngiob ang suga sa plasa.
"Peste ka!" ni Letty dayong hampak sa iyang shoulder bag ngadto sa nawong sa ulitawo.
"Buang!" ni Dory dayong bunal sa payong dala ngadto sa ulo sa ulitawo. Nikaratil og dagan. "Di na gyud ta kasalig sa mga lalaki!" ni Dory nga namahid sa luha. "Ayaw usiki imong luha sa lalaking sama niya!" ni Letty. Namula iyang mata. (Kataposan)