Karong hapona nakahukom si Cristopher nga mosuroy sa mga matahom nga dapit sa siyudad. Gusto niya nga makahibalag siya'g usa ka babaye nga batan-on, tingali giuhaw na siya'g dugo sa usa ka dalagita o di ba kanang dalaga na lang gyod.
Didto sa London diin siya magtrabaho gipatakdan siya sa iyang higala nga Britton. Ug wala siya magtuo nga ungo diay si Engr. Maywell nga kauban niya sa trabaho. Ug dihang natakdan na siya gipainom siya niini'g dugo sa mananap.
"Ako usab, paborito nako ang dugo pero dugo sa tawo ang akong imnon. Ug ang akong asawa nga usa ka Pilipina tua karon sa Pilipinas mipauli. Mangtas usab kadto siya kay akong gipatakdan. Pero, gusto nako nga motilaw ka usab og dugo sa tawo. Oo, dugo sa tawo, kay ungo na man parehas nako..."
"No, dili ko gusto nga mahimong mangtas sama nimo, nga dugo na sa tawo ang imnon. Apan gihaylo gyod siya ni Maxwell ug nakainom gyod siya'g dugo sa tawo. Ug karon ning iyang paghibalik sa Pilipinas gihidlaw siya'g dugo ug dugo sa usa ka dalaga maoy iyang gustong imnon, aron molagsik ang iyang lawas ug kusgan siya.
Sa iyang pagsuroysuroy sa parke may usa ka babaye nga maanyag nga naglingkod sa usa ka puthaw'ng lingkoranan . Iyang giduol ug giila-ila. Ug nagkasuod sila.
Mura'g namatikdan ni Cristopher nga nakagusto usab ang babaye kaniya, busa iya kining gihangyo nga mangadto sila'g motel. Miuyon ang babaye nga nagpaila sa pangalan nga Racquel. Tuod, sa didto na sila sulod sa motel, kalit kaayo ang hitabo kay nahimo mang usa ka dakong iro si Racquel ug kadasmagon na ni Cristopher.
Dinhi nahitabo ang binugnoay sa duruha. Apan nalupig ni Cristopher si Racquel nga mitahan na lang sa iyang lawas ngadto sa lalaki.
Dihang nagdulog na sila sa kama, may gisulti si Racquel. "Dugay ko didto sa London, kay taga didto ang akong bana, usa ka Britton nga engineer, si Engr. Maxwell..."Wala makatingog si Cristopher nga miuna na lang pagbiya sa motel. (Kataposan)