"Nahibawo ko brad nga namoso ka namo ni Bea didto sa dakong bato," hunghong ni Vincent kaniya.
"Unsa?," ni Carlo pa nga mingisi na lang sab.
"Bawos-bawos lang brad human namo ni Bea, kamo na sab si Mira ang among giboso biliba nako nimong modala oy sa tan-aw ko mura gu'g mabuang si Mira sa imong gibuhat niya," matud pa ni Vincent.
"Hilom na oy dili ta maghisgot ana," matud pa sa lalaki nasiplatan ni Vincent si Mira nga way tingog-tingog nga adunay gikuri-kuri.
"Naunsa mana si Mira? Mura'g hilom man kaayo na siya mura sad og gikang mihilak," pangutana sa lalaki kang Carlo.
"Usyosero gyud nimo,"matud pa sa lalaki ug mipadayon sa pag-ingon "wala nay tagay diha?"
"Naa pa hoy brad pikot, tagayi si brad Carlo, mura'g giuhaw kay nakuhaan ra ba nig kusog pa charge," matud pa ni Vincent.
Nagpadayon ang bonding sa barkada samtang ang mga babaye usab nag-iyahay og katulog sa lingkuranang kawayan sa cottage. Alas kwatro sa kadlawon nahubog na ang mga lalaki si Pikot, Tribor ug Vincent, gidulgan nila ang ilang mga pares. Samtang si Carlo, mas gipili nga mangita'g bakanteng cottage aron adto matulog.
Alas sais sa buntag maoy namat-an ni Carlo ang silak sa adlaw maoy nakita niini nga nagkadaghan usab ang mga tawo nga mangaligo sa dagat. Busa mibangon kini ug miadto sa ilang cottage nga giabangan. Nakita sa ulitawo nga busy ang mga babaye sa pag-andam sa ilang pamahaw samtang ang tulo nga sila si Tribor, Vincent ug Pikot, naghagok pa. Nag-nga-nga pa si Pikot samtang si Vincent, nagbilangkad nga natulog.
"Gigutom kana Carlo?", pangutana ni Mira sa lalaki.
"Lami ihigop og kape Mir," matud pa ni Carlo.
"Kutawan tika naka-init na man ko nagdala man og electric kettle si Chona.
"Ayaw ako na nakainit na man kaha?", pangutana sa lalaki.
"Oo ako na lang gud ang magkutaw og kape para nimo," pag-insist pa sa babaye.
"Ako na lang lagi mosamot ko'g kaiko'g nimo ayaw na pun-i ang utang kabubut-on ko kanimo Mir," matud pa sa lalaki.
"Saba diha oy, kabubut-on ba oy ang nahitabo, nahitabo na, dili na nato to hisgotan okay?. Dili ta maka move on kun magsige ta'g hisgot sa nahitabo. Okay na ko ayaw'g kabalaka busa kutawan tika'g kape," matud pa sa babaye.
"Aw ikaw gud sige kay pukawon ko sab ning tulo mga alas 10 siguro ta mamauli balik sa siyudad," matud pa sa lalaki.
Human mapukaw ug makakape ang grupo nakapamahaw na sab nangandam na sila aron mamauli.
Kapoy ang lawas ni Carlo nga gisubay ang dalan paingon sa ilang balay samtang nagkabiba sa iyang backpack. Pipila ka lakang na lang aron maabot na siya sa pultahan sa ilang balay may tingog siyang nabati. Nasurpesa ang lalaki sa maong tingog kay tingog kini sa usa ka babaye.
"Wala nay kapuslanan nga magdugay pa ta kuhaon ko ang akong anak ug bahala kana sa imong kinabuhi!"Matud pa sa tingog sa babaye nga nabati ni Carlo gipaminaw sa ulitawo'g maayo ang maong tingog. Giklaro kun kang kinsa kining tingog nga naa magagikan sa ilang balay. (Sumpayan)