Agwador og tubig si Pete sa ilang barangay sa publikong puso-artisyano ug nakabaton og daghang mga suki, ilabi na gyud kun maatlan nga mapawong ang tubig sa MCWD.
Ilo siyang tuwapos ug nag-inusarang nagpuyo sa iyang barungbarong sa edad nga 30. Ulitawo. Nahaungot ang panan-aw ni Pete sa gamay'ng imahen ni Senyor Santo Niño, sa gamay usab niyang altar sulod sa iyang barungbarong. Gibalik niya'g kalso sa iyang bulsa sa karsones ang 200 pesos nga kinitaan.
"Senyor Santo Niño, sayod kang gikan pa sa sinugdan, nag-antos ko sa tumang kakabos! Taliabot na usab ang imong kapistahan ug ang Sinulog Festival! Kaluy-i tawon ko nga makakuwarta ko'g dugang kinitaan, aron sadya ang akong pagsaulog sa imong pista...!"
Miduol si Pete sa gamay’ng imahen ni Senyor Santo Niño. Nakurat siya! May gamay'ng papel sa kilid sa imahen nga karon lang niya makita. May tulo ka numerong nahisulat! Dili tigpusta si Pete og swertres sa lotto, apan sa iyang nakita karon nga nasulat sa gamay'ng puting papel, nakahunahuna siya'g pusta sa maong numero.
"Senyor Santo Niño, katingan nako ang akong kinitaan karon sa pagpangagwada og tuig nga 200 pesos. Ang P100 , ipalit nako'g bugas NFA ug ang laing P100, akong ipusta. Kun modaog ko, isaad kong magsinulog ko atubangan sa simbahan sa Basilica Minore ug maglitson ko'g usa ka buok baboy aron imbitahon ang mga silingan ko dinhi sa eskuwater atol sa imong kapistahan...!"
Gibagdok niya ang usa ka gatos ka pesos!
Pagkaugma, hilabihang lipaya ni Pete. Migula gayud ang swertres numero Gikuha ni Pete ang gamay'ng imahen ni Senyor Santo Niño sa gamay niyang altar sa barungbarong ug misinggit sa tumang kalipay.
"Pit Senyor! Viva Senyor Santo Niño! Tumanon ko gayud ang magsinulog atubangan sa simbahan sa Basilica Minore! Mahinayon gayud ang paglitson ko'g baboy atol sa imong kapistahan! Salamat Senyor Santo Niño sa swertres numero nga imong gihatag kanako!" (Kataposan)