Nanagat si Enciong mangtas

Kada uli ni Enciong gikan sa iyang pagpanagat hamabaw gyud sa kuha niyang mga isda ang luwang sa iyang sakayan. Ug sugaton dayon siya sa iyang mga silingan. Ang uban mangutang, ang uban usab mopalit ug pakapinan ni Enciong.

Ug didto sa may unahan og gamay mao poy pagdunggo ni Matoy, ang silingan pong mananagat ni Enciong.  Sa tan-aw ni Enciong, mura'g huyhoy ang abaga ni Matoy. Maihap lang ang kuha niini. Igo ra gyud sa ilang konsumo.

"Ako nagtuo, Berta, nga kana si Enciong ungo na," ni Matoy pa ngadto sa asawa. Ug kay numero unong tabian kini si Berta, dali rang mikaylap ang balita nga si Enciong usa diay ka mangtas nga ungo. Ug nahibulong si Enciong sa iyang pagdunggo sa baybayon nga wala na may manugat kaniya aron mopalit sa iyang mga kuhang isda. Ug iyang nakita nga adto na man mopaingon sa nahimutangan ni Matoy didto sa may unahan og gamay nga bag-o pong nahiabot gikan sa lawod.

"Enciong," ni Birang nga lab-asira dinhi sa sityo. "Wa ka mahibawo nga ikaw may gisumsoman sa mga tabi sa may eskina."

"Unsang tabia, ha, Birang," ni Enciong pa nga mipungko sa may tarik sa iyang sakayan nga hamabaw gihapon sa mga isda.

"Nga mao kunong kanunay'ng puno ang imong sakayan kay ungo kuno ka," ni Birang pa.

Mipahiyom si Enciong. "Mao ba, unsa diay? Aw, bahala na sila, basta ang akoa nga makakuha lang ko'g daghan. Kinsa man say nagpadagan anang maong tabi, ha, Birang?"

"Da, si Berta, asawang Matoy.

Pagka-gabii, dihay tingog sa wakwak. Didto kini mopaingon sa ka Matoy. Ug may nadungog ang mga silingan nga mura'g usa ka babaye nga nalisang.

"Ayyy, tabang mo, gisaka mi'g wakwakkk! Tabang mooo...buot mobalbal namong Matoy, tabanggg mooo, mga silingannn!

Pagka-ugma sa buntag maoy nakita sa mga anod ang patay'ng lawas sa magtiayong si Matoy ug si Berta. Nahabwa ang ilang mga tinai. Ug diha sa tugkaran sa ilang payag dihay daghang isda nga mga patay nga nagpasad nga mura'g gituyo pagbutang. (Kataposan)