Gihatagan si Nayong og parol sa duwende

Nadungog ang karaang mansion ni Mr. Anton nga dunay nagpuyo nga kapri. Pero, si Nayong nga hardinero misupak nga miingon nga dili kapre ang nagpuyo sa karaang mansion kondili mga duwende.

“Unsa, Nayong, dunay mga duwende ang karaang mansion ni Mr. Anton. Uy, kuwaya gud. Aw, dugay na man sad gud nang wala na kapuy-i,” ni Agosto nga mangungodak nga silingan ni Nayong.

“Kuyawa lagi nako, bay Agosto, kay hardinero lang lagi ko nga maoy nagmintinar sa dakong tanaman ni Mr. Anton. Gusto man gud sa asawa ni Mr. Anton nga si Ma’am Lowela nga inig pauli nila gikan sa London, buhi ang iyang mga bulak...” ni Nayong nga nagpitokpitok ang mga mata. Kusog kaayong mopitok ang mga mata ni Nayong labi na’g motabi na siya. Matud pa nakakaon kuno kini siya’g sobra sa ilaga maong nagsige na lang og pitok ang mga mata.

“Bay Nayong, atong kodakan kanang giingon mong duwende,” ni Agosto nga nagpahiyom. “Mosikat gyod ko, kun duna koy makuhang hulagway sa mga gagmay’ng tawo. Di ba, gagmay man kaayo nang mga duwende...?”

“O, uy. Sige, kuyog unya nako karong gabii, kay mohilom ta’g lili sa hawanan sa mansion,” ni Nayong nga seryoso ang nawong.

Ug kay wala may lugar si Agosto, mihangyo siya nga ugma na lang sa gabii sa noche buena, kay karong gabii duna siya’y pangodakan didto sa pikas baryo. Tuod, nianang pagka gabii sa noche buena miadto dayon ang duruha. Si Agosto nagdala sa iyang camera ug hilom silang misaka sa karaang mansion. Unya, pagbagting gyud sa alas dose, Pasko na, ug Noche Buena na ug maoy pagpanggula sa mga duwende. Ug gitawag sila ug unya gihatagan sila’g mga Parol.

“Sige na, panguli na mo, ug Merry Christmas ninyo,” nagkanayon kadtong guwangon nga duwende. Ug ugma, moadto ko sa inyong mga balay...”

Bugnaw ang hangin sa Pasko ug sila si Agosto ug Nayong, gibatig kakulba sa ilang nakita. (Katapusan)