Bisan iresponsable si Jack nga pagkabana apan dili kini igong katarongan nga magpakasala ako sa among kaminyoon. Dili gayod diay matul-id ang usa ka sayop pinaagi sa paghimo og laing sayop.
Wala ko makigbatok sa mga ginikanan ni Jack. Nasayod ko nga gikaguol nila’g maayo ang kamatayon sa ilang anak. Bisan unsa ka badlungon sa usa ka anak apan mahalon gayod kini sa iyang mga ginikanan. Mao nga nahisabtan ko ang mga ginikanan ni Jack. Giangkon ko nga usa gayod ako sa mabasol sa kamatayon ni Jack.
Ang maong panghitabo daw usa ka makalilisang nga daman sa udtong tutok nga midangat sa akong kinabuhi.
Dihang gikalubong na si Jack, takulahaw lang nahibutho sa among dapit si Orlan. Nakalitan ako sa iyang paghiabot.
‘Wala ako mahimutang,” niya pa. “Sukad sa imong pagpauli dinhi wala na ako makabalita bahin nimo. Nabalaka ko nga tingalig unsa nay nahitabo nimo, Darlene. Maong nangahas gyud ko pag-anhi aron magkakita ta.”
Gitug-anan ko si Orlan sa tanang nahitabo sa akong pagpauli sa among dapit, lakip na ang kamatayon ni Jack.
“Ayaw na hasola ang imong kaugalingon sa iyang gidangatan,’’ matud ni Orlan.
Ug nagkasabot kami si Orlan nga magpakasal na kami aron pagpanday og bag-ong pamilya. – Kataposan