Daman Sa Udtong Tutok

Gula 54

Animal ka!" Gahot ni Jack. "Wa kay hinungdan nga pagka-asawa. Nagbuling-buling ka lang sa akong bansagon!"

"Ikaw ra usab ang mabasol kun nganong naingon ako niini, Jack," giingnan ko siya. Misumbalik ako sa pagtulisok kaniya.

"Punyeta!" Nagpaminti siya. "Ako pa hinuon ang imong pakasad-on sa imong pagkakuragan, animal ka!"

"Tungod kay kun dili pa tungod sa imong pagka-iresponsable nga pagka-bana," nako pa. "Dili unta ko manarbaho didto sa Cebu. Dili unta ko makakita og laing lalaki nga maoy makahulip sa imong pagkuwang."

"Ingna lang gyud nga wala kay kalainan sa mga babaye nga mugbog lupad," nagkanayon si Jack.

"Angkunon ko," matud ko. "Pero dili ako ray mabasol niining hitaboa. Kun nagtarong ka pa unta, mahalikay unta ko sa disgrasya. Makalikay unta ko sa tentasyon. Mao nga basola karon ang imong kaugalingon."

Wala na motubay si Jack sa among panaglalis. Mikanaog siya sa balay ug milakaw. Mipalayo siya kanako.

"Maayo gani kay wala ka dapati sa imong bana, Darlene," nagkanayon si Nanay Ludy dihang nakalakaw na si Jack.

Nasayod kong dili si Jack makahimo sa pagdapat kanako, Nay," matud ko. "Tungod kay dili kay ako ray sad-an niining hitaboa."

"Unya," ni Tatay pa. "Unsa may imong plano karon?" 'Naa ra ni Jack ang tanan," nako pa. "Kun makigbuwag siya nako, di nako siya balibaran."

Nahitutok ang akong mga ginikanan kanako.

Natugkad ko ang kasalabtunon sa tinan-awan nila ni tatay Barlo ug nanay Ludy kanako.

"Pasayloa ko ninyo, Tay, Nay," matud ko nga nakahilak. "Hinaot unta nga dili mausab ang inyong pagtan-aw kanako bisan niining nahitabo sa akong kinabuhi."

"Dili kana mahitabo, anak," nagkanayon si nanay Ludy. "May pagkuwang usab kami kanimo kaniadto," ni tatay Barlo. "Gusto namo kining kahulipan. Bisan unsa pay mahitabo kanimo, magpabilin ka nga among anak.

"Salamat, Tay, Nay," nako pa. "Daghan kaayong salamat."

Ug naggaksanay kami.

Nianang pagkagabii, wala mopauli si Jack sa among pinuy-anan. Wala ko na lang usab siya pangitaa. Nasayod na ko sa hinungdan. Ug nakaseguro ko nga atua siya sa iyang mga barkada. -- Sumpayan pa