Gula 51
"Wad-a na kanang imong insecurities bahin sa imong pagka-lalaki, Orlan," giingnan ko siya. "Ang kalipay sa panaghilawas wala sa gidak-on sa kargada kun dili naa sa performance."
"Maayo ba diay ko'g performance, Dar?" sukit niya.
"Para nako," matud ko. "Okey lang. Pero ambot lang kaha sa imong asawa kay gibuwagan ka man niya. Tingalig kuwang kini alang kaniya. Tingalig taas siya'g expectation nimo. Depende man gud kana sa babaye."
"Nindot unta kun pareho pa nimo ang akong asawa," nakaingon siya.
"Ayaw na'g hunahuna'g ingon niana," matud ko. "Di gyud mahitabo nga pareho nako ang imong asawa. Managlahi ang mga babaye."
Tungod sa pagpakabuang nako ni Orlan, nahikalimtan ko nga may bana ako. Nasayod kong nakasala ako sa kaminyoon namo ni Jack. Pero wala ko mabalaka kun unsa man unya ang mahimong linugdangan sa pagpakigrelasyon ko kang Orlan.
Basta alang nako, dili makabasol kanako si Jack kun nganong naingon ako niini. Siya ang angay basolon. Kay kun nagtinarong pa unta siya sa pagtrabaho, dili man unta ako manarbaho sa Cebu. Dili unta kami magkakita si Orlan.
Hangtod nga miabot ang panahon nga ang tinagoang relasyon namo ni Orlan may hulga na nga madayag. Nagbunga ang among gibuhat. Nagsabak ko. Dinhi na nako maamgohi ang dakong problema.
Gisultihan dayon nako si Orlan bahin sa akong kahimtang human ako makapahiling sa usa ka doktor. Nakugang siya sa akong gitug-an kaniya.
"Unya," niya pa. "Unsa man ang buhaton nato karon?" "Wa pa ko masayod," matud ko. "Naglibog pa ko."
"Dili ko molikay sa akong kaakohan diha nimo," matud ni Orlan. "Kun unsa man ang makab-ot mong desisyon, suportahan ta ka."
"Salamat, Orlan," giingnan ko siya. "Sultihan ko lang unya ikaw kun makadesisyon na ko. Hunahunaon ko pa kini'g maayo."
"Ikaw ang mag-igo," nagkanayon si Orlan.
Sa daghang mga gabii gihinuktokan nako'g maayo kun unsay akong buhaton kalabot sa akong kahimtang nga usa ka dakong mabdos. Talikdan ko na ba lang sa hingpit ang akong pamilya ug makigtipon na ako kang Orlan?
Naglisod ko paghukom. Sa pagkakaron, nabatyagan nako nga wala na gayod akoy pagbati alang kang Jack nga akong bana. Apan dili usab mahimo nga pasagdan ko na lang ang among mga anak. -- Sumpayan pa