Gula 48
Misulod ko sa akong kuwarto sa servants quarter. Mihigda ko. Dugay kung nahikatulog niadtong gabhiona. Maoy akong gihunahuna si Orlan.
Sukad niadto, akong namatikdan nga naglikay na si Orlan kanako. Akong nasabot nga dili na siya buot nga magkaduol ug magkasulti kami. Nakasabot ko kun nganong iya kining gibuhat. Gituman niya ang iyang gisulti nga dili siya magsamok sa akong kinabuhi.
Wala ako makasabot sa akong kaugalingon. Mura'g misamot hinuon ang kaluoy nga akong gibati ngadto ni Orlan.
Nanglabay ang daghang mga adlaw. Wala na gayod kami magkasulti si Orlan. Nagpadayon siya sa paglikay kanako bisan nagpuyo kami sa samang balay.
Hangtod nga usa ka gabii niana, wala na ako makaantos sa pagpunay og likay ni Orlan kanako. Dihang nagmingaw na ang palibot, nanuktok ko sa pultahan sa kuwarto nga iyang katulganan.
Taudtaod gayod ang akong pagpanuktok sa gawas sa pultahan. Paglabay sa pipila ka gutlo, gibuksan ni Orlan ang pultahan.
"Nga-nganong nia ka?" niya pa nga daw nakurat sa pagkakita kanako.
"Pasudla una ko," matud ko.
Wala na ako magpaabot ni Orlan nga iya kung agdahon sa pagsulod sa iyang kuwarto. Misulod na ako ug gitak-opan ko ang pultahan.
"M-may tuyo ka kanako, Dar?" Nangutana siya.
"Oo," tubag nako. "Gusto kong magkasulti ta'g maayo."
"Bahin sa unsa man kana?"
'Bahin sa imong paglikay nako. Nganong imo man kining gibuhat?"
"Nasayod ka na sa hinungdan. Dili ko buot nga maghatag kanimo'g dugang problema. Nasayod kung daghan ka na'g suliran nga gipas-an karon."
"Pero sakit alang kanako ang imong gihimo."
"Nganong sakitan ka man? Angay ka pa man ganing malipay nga wala ako magsamok nimo. Dili ko buot nga makaguba sa imong kaminyoon, Darlene."
Wala ako makatingog.
"Usa usab ako ka bana, Darlene," nagkanayon si Orlan. "Nasinati ko kun unsa kasakit kun luiban kita sa atong asawa. Dili ko buot nga matagamtam sa imong bana ang kapait sa kinabuhi nga akong nasinati."
Wala gihapon ako makatingog. Gipalugdang ko sa akong alimpatakan ang tanan nga gipanulti ni Orlan. -- Sumpayan pa