Daman sa udtong tutok

Gula 45

Paglabay sa duha ka semana, dihay lalaki nga miaplay pagka family driver sa banay'ng Adriane. Sa akong banabana, mga kawhaan og lima kapin kun kulang pa lang ang iyang pangedaron. Gidawat siya sa akong mga agalon.

Gikasunod nako ang maong lalaki. Orlan ang iyang ngalan. Hilomon siya. Akong namatikdan nga daw may kaugalingon siyang kalibotan. Kanunay ko siyang makita nga maghinuktok. Maglamugdong ang nawong. Mora'g may lawom nga gihunahuna.

Usa ka higayon niana, nagkasulti kaming duha.

"Minyo ka na ba, Orlan?" Akoy miuna sa pagpangutana kaniya.

"Oo," niya pa. "Pero way suwerte ang akong kaminyuon." "U-unsay buot mong ipasabot?" Nahitutok ako kaniya.

"Unom ra ka buwan nga nagtipon kami ug ang akong asawa,"" niya pa. "Nga-ngano man?" matud ko. "Unsa may hinungdan?"

"Wala dayon siya motubag. Miduko siya. Mibuhi og lawom nga panghupaw."

"N-nadisgrasya ba ang imong asawa, Orlan?" Sukit ko. "Wala," maoy tubag niya. "Ang amo hinuong kaminyoon ang nadisgrasya."

"H-ha?" matud ko nga wala makaagpas sa iyang gisulti. "Mikuyog sa laing lalaki ang akong asawa," niya pa.

Nakugang ako sa gitug-an ni Orlan. Mibati ako'g kaluoy kaniya. Kinsay dili maluoy nga sa akong pagbasa sa iyang pagka tawo, buotan man siya nga pagka lalaki.

Nganong nakahimo man ang iyang asawa sa pagluib sa ilang kaminyoon?

"Gikasubo ko ang nahitabo sa inyong kaminyoon, Orlan," matud ko. "Salamat," niya pa nga nagduko sa akong atubangan. Mipataliwala kanamo ang kahilom.

"Ikaw," mitingog siya pagkataudtaod. "Minyo na ba usab?"

"Oo," matud ko. "Tulo nay akong anak."

"Maayo ka pa kay nakakita na sa imong liwat," komento niya.

"Tinuod kana," nako pa. "Pero miserable ang akong kaminyuon."

"Nganong nakasulti ka man niana?"

"Way trabaho ang akong bana. Barkadista nga walay ikaduha. Mao kini ang hinungdan nga napugos ko sa pagpanarbaho."

"Demalas sab diay ang imong kinabuhi." "Mao lagi." Ug mipatungha na usab kanamo ang kahilom. – Sumpayan pa