Daman Sa Udtong Tutok - Gula 42

Kugihan kaayo si Jack. Maayong modiskarte sa panginabuhi. Wala gayod ako masayop nga siya ang akong gipili nga pakaslan. Responsable siya nga pagka lalaki. Sulondon nga bana ug amahan sa pamilya.

Apan dihang nanganak na ako sa ikaduhang bunga sa among kaminyuon, namatikdan ko ang inanay nga pagka-usab sa kinaiya ni Jack. Nagsige na lang siya'g estambay. Nahingog siya sa barkada. Napasagdan niya ang umahan.

May mga higayon nga gabii na siyang mopauli sa among balay. Kanunay siyang mahubog. Mao kini ang hinungdan sa kanunay usab namong panaglalis.

Nasinati nako ang kalisod sa among kahimtang. Kun makakuwarta si Jack, igo ra kining igasto sa iyang bisyo kay gawas sa bisyo sa inom, misalga na usab siya sa sugal. Nagbaton na siya'g daghang mga manok nga igtatari. Dinhi misamot ang kamiserable sa akong kinabuhi.

Usa ka adlaw niana, gipakigsultihan nako si Jack. Ako siyang gihangyo nga mobiya na sa iyang mga bisyo tungod ug alang sa kaugmaon sa among mga anak.

"Sagdi, lang, Dar," niya pa. "Mangita lagi ko'g trabaho. Ayaw lang ko apuraha. Nasayod ko sa akong gibuhat."

Abi ko'g tumanon ni Jack and iyang gisaad kanako. Pero namatikdan man hinuon nako nga misamot ang iyang kahingag sa bisyo. Diha gani higayon nga nagkalalis gyud kami'g maayo kay iyang gibuak ang alkansiya kay gipusta sa gitari niyang hiniktan. Nakadugang sa akong kalagot kay gibuno ang iyang manok.

"Bayran lagi nako kun makakuwarta na ko," ni Jack pa.

"Dili kana ang gusto kong mahitabo, Jack," matud ko. "Gusto ko nga mobiya ka na sa imong mga bisyo."

Apan nagpadayon gayod si Jack sa iyang bisyo. Naluoy na ako pag-ayo ni nanay Ludy ug tatay Barlo nga maoy nanikaysikay sa among panginabuhi. Dili man sab ko makatabang kay masuso pa man ang akong anak nga si Elias.

Usa ka Domingo niana, nakadungog ko nga nakadaog si Jack sa buwang.

Nakabuno kuno ang iyang hiniktan. Apan wala mopauli si Jack sa amo nianang pagka-gabii. Nakaadlawon na lang ko'g pinaabot niya apan wala gayod siya moabot.

Niana nang pagkabuntag mipauli si Jack. Namatikdan ko nga nanimaho kining ilimnon. Hubog! Wala kini makigsulti kanako. Midiretso siya sa kuwarto ug natulog. Wala lang nako siya tugawa. -- Sumpayan pa